Xəbər verildiyi kimi, Gənclər Təşkilatları Milli Şurasının ötən həftə keçirilən qurultayında “Vətəndaş Cəmiyyətində Debat” İctimai Birliyinin icraçı direktoru Şahin Seyidzadə quruma yeni sədr seçilib. Gənclər sektorunda xüsusi marağa səbəb olan bu seçkilərlə bağlı danışan“İslahatçı Gənclər” Birliyinin sədri Fərid Şahbazlıbildirib ki, rəhbərlik etdiyi təşkilat Milli Şuranın üzvü olmasa da, bu prosesi yaxından izləyib:
“Hesab edirəm ki, Milli Şuranın sədrliyinə keçirilən seçkilər ölkə gəncliyinin həyatında olduqca mühüm hadisə kimi tarixə düşdü. Kimin nə deməsindən asılı olmayaraq, Milli Şuraya 8 il rəhbərlik edən millət vəkili Fuad Muradov ölkənin ictimai-siyasi həyatında, xüsusi ilə gənclər sektorunda ciddi nüfuz və mövqe sahibidir. Bu statusda bir siyasətçinin öz yerini yeni komandaya təhvil verməsi bütün hallarda təqdirəlayiq addımdır.O ki qaldı Milli Şuranın bundan sonrakı fəaliyyətinə- bu haqda danışmaq, qiymət vermək hələ çox tezdir. Çünki bu gün Milli Şuranın uğurları ilə yanaşı, qarşıda görüləsi bir xeyli zəruri işləri də var.
Prezident Adminstrasiyasının şöbə müdiri hörmətli Elnur Aslanov da qurultayda bildirdi ki, Milli Şura zaman-zaman ölkənin gənclər sektorunda xüsusi nüfuz sahibi olub. Ayrı-ayrı dövrlərdə bu qurumun rəhbərliyində təmsil olunan gənclər hazırda müxtəlif sahələrdə dövlət idarəçiliyində yüksək potensiallı kadrlar kimi iştirak edirlər. Bu gün isə təəssüflə qeyd etməliyik ki, ölkədə fəaliyyət göstərən 220-dən artıq gənclər təşkilatının yalnız üçdə biri Milli Şuranın üzvüdür. Bu o deməkdir ki, Milli Şuranın əvvəlki statusunu özünə qaytarmaq lazımdır. Milli Şuranın yeni rəhbərliyinin üzərinə düşən əsas vəzifə bu qurumu bütün gənclərin etibar etdiyi və ətrafında birləşdiyi bir təsisata çevirməkdir. Bunun üçün isə proseslərə və təşkilatlara fərdi, yeni və ədalətli yanaşma tələb olunur. İnanmaq istərdik ki, Milli Şuranın yeni rəhbərliyi fəaliyyətini cənab Prezidentin gəncliyimizin qarşısına qoyduğu vəzifələrə uyğun formada həyata keçirəcək”.
Fərid Şahbazlı son olaraq rəhbərlik etdiyi təşkilatın Milli Şuraya indiyə qədər üzv olmamasına da toxundu: “Heç şübhəsiz ki, bu məsələ obyektiv amillərlə bağlıdır. Ancaq indiki məqamda bu barədə danışmağı uyğun saymıram. Sadəcə arzulayıram ki, Milli Şuranın yeni rəhbərliyinin fəaliyyəti Şuradan kənarda qalmış digər təşkilatlar kimi, bizim də bu quruma üz olmağımız üçün stimul rolunu oynasın”.
