Payız-qış aylarında qrip və digər mövsümi virus infeksiyalarının yayılması halları artır.
Xüsusilə məktəblərdə, iş yerlərində və insanların sıx olduğu məkanlarda yoluxma riski yüksəlir. Belə dövrlərdə qoruyucu tədbirlərə əməl etmək həm fərdi sağlamlığın qorunması, həm də infeksiyaların yayılmasının qarşısının alınması baxımından mühüm əhəmiyyət daşıyır.
Bəs mövsümi xəstəliklərdən qorunmaq üçün hansı tədbirlər görülməlidir? Xəstəliyə yoluxan şəxslər başqalarını yoluxdurmamaq üçün nələrə diqqət etməli, hansı hallarda həkimə müraciət etməlidirlər?
Mövzu ilə bağlı AZXEBER.COM-a danışan tibb elmləri doktoru, professor Adil Qeybulla bildirib ki, payız aylarında xəstəliklərin geniş yayılmasının əsas səbəblərindən biri infeksiyaların insanlar arasında sürətlə ötürülməsidir:
"Ümumiyyətlə, xəstəliklər payız aylarında geniş yayılır. Məktəblərdə bir nəfər xəstələndikdə, ətrafındakı xeyli insan da eyni xəstəliyə yoluxur. Bu, niyə baş verir? Bir şəxs adətən soyuq hava şəraitinə uyğun geyinmədikdə, immun sistemi zəiflədikdə və ya soyuqladıqda xəstələnə bilər. Belə hallarda virus infeksiyalarına yoluxma riski artır. Xəstəlik yoluxucu olduqda isə həmin şəxs asqırıb-öskürməklə virusları ətrafa yayır və digər insanların tənəffüs yollarına keçməsinə səbəb olur. Daha sonra həmin şəxs işə, məktəbə və ya auditoriyaya gedir, orada da asqırıb-öskürərək başqalarını yoluxdurur. Beləliklə, qısa müddətdə xeyli insan xəstələnə bilir”.
Professorun sözlərinə görə, xəstəliklərin yayılmasında insanların qoruyucu tədbirlərə əməl etməməsi də mühüm rol oynayır:
"Bu gün Bakıda da soyuqdəymə əlamətləri ilə xəstələnənlərin sayı kifayət qədərdir. Təəssüf ki, xəstə insanların çoxu maskadan istifadə etmir. Halbuki onlar düşünməlidirlər ki, ətrafdakı sağlam insanlar niyə xəstələnsinlər? Bizdə ümumilikdə ictimai məsuliyyət və şüur səviyyəsi aşağıdır. İnsan həm özünü qorumalı, həm də ətrafındakı insanları yoluxmaqdan qorumalıdır. Təəssüf ki, bu yanaşma hər zaman müşahidə olunmur və problemlər də məhz buna görə yaranır”.
A. Qeybulla qeyd edib ki, bəzi ölkələrdə xəstəliklərin yayılmasının qarşısını almaq üçün maskadan istifadə etmək gündəlik vərdişə çevrilib:
"Məsələn, Yaponiya kimi ölkələrdə maskadan istifadə etmək artıq bir normaya çevrilib. İnsanlar xəstə olduqları zaman həm özlərini, həm də ətrafdakıları qorumağa çalışırlar. Təəssüf ki, COVID-19 pandemiyası da bu baxımdan hər kəs üçün ciddi dərs olmalı idi. Digər bir problem isə maskadan düzgün istifadə edilməməsidir. Maska taxan insanların bir çoxu onu ağızlarına düzgün yerləşdirmir, burunlarını açıq saxlayır, maskanı tez-tez aşağı çəkib yenidən qaldırırlar. Bu halda maskadan istifadənin effektivliyi azalır”.
Fəridə Əsədzadə
