Festivalla bağlı Xalq artisti, professor, Mədəniyyət və İncəsənət Universitetinin estrada və musiqili teatr rejissorluğu kafedrasının müdiri Ramiz Əzizbəyli AZXEBER.COM-a eksklüziv açıqlama verib. O teatr festivalının əhəmiyyətindən danışıb: “Mən bu layihəyə görə çox sevinirəm. Çox sevindirici haldır ki, bu teatr festivalı Azərbaycanın Milli Qəhrəmanı, vətən, torpaq naminə öz şirin canından keçmiş Mübariz İbrahimovun əziz xatirəsinə həsr olunur. Mən özüm ilin əvvəlində Mübariz İbrahimovun evində oldum, onun valideynləri ilə söhbət etdim. Hər bir azərbaycan vətəndaşı, azərbaycanı gənci Mübariz kimi öz vətənini sevməlidir, öz vətəninə sadiq olmalıdır. Vətənpərvərlik, vətənə bağlılıq hər bir azərbaycanlının içində olmalıdır”.
Ramiz Əzizbəyli teatr festivalının keçirilməsində gənclərin aktivliyinin də təqdirəlayiq hal olduğunu deyib: “Çox sevindirici məqamdır ki, bu layihənin keçirilməsində gənclər əsas rol oynayır. Səhv etmirəmsə bu gənclərin təşəbbüsüdür. Məncə yaşı nisbətən çox olan insanların həyat təcrübəsi, dünyagörüşü, vətənə bağlılığı yetərincə olur. Bu məsələdə əsas gənclərlə işləmək lazımdır. Onlarda vətənə, millətə sevgi aşılamaq hər birimizin borcu olmalıdır. Əminəm ki, bu festivala gənclərin marağı çox böyük olacaq. Biz sənət adamları da bu layihəyə canla-başla kömək etməyə hazırıq. Şəxsən öz adımdan deyirəm ki, əgər təklif gəlsə böyük məmnuniyyətlə münsiflər heyətində əyləşib, istedadlı gəncləri seçərəm”.
Qeyd edək ki, layihənin ideya müəllifi, millət vəkili Jalə Əliyevadır. Layihə Gənclər və İdman Nazirliyinin və Mədəniyyət və Turizm Nazirliyinin dəstəyi ilə icra olunur.
Layihədə iştirak etmək istəyən 35 yaşınadək gənclər ssenarilərini və qrup üzvlərinin koordinatlarını [email protected] elektron ünvanına göndərə bilərlər. Ssenarilər hekayə, roman, pyes şəklində ola bilər. Layihənin media tərəfdaşları arasında AZXEBER.COM İnformasiya portalı da var.
Hacıbəy Heydərli
