Əməkdar artist Sahib İbrahimovun şou verilişlərindən birində "Manafla Taciri bir tutmayın. Onları bir tərəziyə qoymayın. Tacir məktəbdir. Manafa hörmətim var, amma o, məktəb deyil” fikirlərini səsləndirməsi həmkarı Manaf Ağayev ilə arasında qalmaqala səbəb olub.
AZXEBER.COM xəbər verir ki, ötən gün "Tarixin bir günü" verilişində qonaq olan Manaf Ağayev Əməkdar artistin bu fikirlərinə sərt reaksiya verib.
O, canlı yayımda Sahib İbrahimovun onu adıçəkilən sənət yoldaşları ilə müqayisə etməsini yaxşı hal hesab etmədiyini deyib:
"Sahib məni Tacir Şahmalıoğlu ilə müqayisə edəndə çox aşağılayıb. Sahibin başı üçün deyil ki, mənim sənətim haqqında bir söz desin. Tacirin öz yeri var, mənim öz yerim. Ümumiyyətlə, hərənin öz yeri var. Sahib deyir ki, Manafla Taciri bir tərəziyə qoymayın. Niyə? Tacirin hansı ifası məndən üstündür? Onun oxuduğu qədər oxuyaram. Amma siz görün Sahib Tacir kimi oxuya bilərmi? Əlbəttə ki, yox" sözlərini söyləyib.
AZXEBER.COM Manaf Ağayevin bu sözləri ilə bağlı Əməkdar artist Sahib İbrahimovun mövqeyini öyrənib.
Sənətçi, ilk dəfə belə qalmaqalda adının hallandığını deyib:
"Manafın dediklərindən xəbərim var, amma mən qalmaqal edəcək adam deyiləm. Sözümün yerini bilən kişiyəm. Mənim qonaq olduğum verilişdə söhbət sənətdən gedib, mən kiminsə şərəf və layəqəti haqda söz deməmişəm. Bütün dediklərim sənət baxımından doğru bildiklərimdir. Təbii ki, Manaf bəy yaxın günlərdə bu dediklərinin cavabını layiqincə alacaq. Bu günə qədər xalqın içində olan adamam. Mən həyatımı göstəriş üçün yaşamamışam. Sahib olduqlarımın da heç yüzdə birini göstərməmişəm heç kimə. Məni dəstəkləyənlər də çox sağ olsunlar. Görürəm, izləyicilər rəylərdə ünvanıma yaxşı sözlər deyirlər. Mənə görə narahat olmasınlar. Elə canlı yayımda da mən Manafın layiqli cavabını verəcəyəm".
Aysel Hacızadə
