“Bu qədər ölümə və iztiraba səbəb olan müharibə başa çatdıqdan 17 il sonra münaqişəni həll etmək və barışıq yollarını axtarmaq vaxtı çatıb”
Bakı-APA. “İkinci dünya müharibəsindən sonra general de Qoll və kansler Adenauer sülhə nail olmaq üçün rəşadət göstərdilər. Çünki bəzən müharibəni davam etdirməkdən çox sülhə nail olmaq daha böyük cəsarət tələb edir. Əsl dövlət xadimi kimi onlar müharibədən cəmi bir neçə il sonra öz xalqlarını inandıra bildilər ki, sülhün alternativi yoxdur və tərəflər nifrətini boğmalı və sülh və əməkdaşlığa can atmalıdırlar. Siz ermənilər və azərbaycanlılar da məhz bu yolu seçməlisiniz”. APA-nın məlumatına görə, bu fikirləri Fransa prezidenti Nikola Sarkozi Ermənistanın “Mediamaks” agentliyinə müsahibəsində deyib.
Onun sözlərinə görə, Azərbaycan və Ermənistan sülh yolunu seçmək riski qarşısındadır: “Çünki status-kvonun qorunmasında təhlükəli heç nə ola bilməz. Status-kvo illüziyalar yaradır, qisasçılıq hissini qızışdırır və sülhə nail olmaq perspektivlərini hər gün daha da uzaqlaşdırır. Dağlıq Qarabağın Ermənistan üçün nə demək olduğunu dünyada Fransadan yaxşı heç bir dövlət anlaya bilməz. Lakin bu qədər ölümə və iztiraba səbəb olan müharibə başa çatdıqdan 17 il sonra münaqişəni həll etmək və barışıq yollarını axtarmaq vaxtı çatıb. Ermənistandan sonra səfər edəcəyim Azərbaycanda da prezident Əliyevə bu sözlərimi çatdıracağam”.
Nikola Sarkozi Avropa Birliyinin Cənubi Qafqaz regionunda rolunu dəyərləndirib: “Fransa Avropa Birliyinin Ermənistandan başlayaraq bütün region ölkələri ilə sıx əlaqələr qurmasını istəyir. Cənubi Qafqaz Avropa Birliyi üçün strateji bölgədir. Beynəlxalq ictimaiyyətin Dağlıq Qarabağ münaqişəsinin nizamlanmasına səylərini gerçəkləşdirəcək format mövcuddur, bu, Minsk Qrupudur. Hər üç həmsədr ölkə münaqişənin hər iki tərəfində etimad doğurur və onlarla birlikdə münaqişənin nizamlanması prosesinə tam şəkildə cəlb olunublar. Lakin ilk olaraq siz ermənilər və azərbaycanlılar bu həll yolunu tapmalısınız. Biz kömək edə bilərik, amma sizin əvəzinizə sülhü bərqərar edə bilmərik”.
Fransa prezidenti Türkiyə-Ermənistan münasibətlərinə də toxunub: “Diplomatik münasibətlərin bərpa olunması və sərhədlərin açılması haqqında protokollar böyük ümidlər doğurmuşdu. Bu gün barışıq prosesi dalana dirənib, mən buna çox təəssüf edirəm. Prezident Sərkisyan Parisdəki görüşlərimizdən biri başa çatdıqdan bir gün sonra müdriklik nümayiş etdirərək bəyan etdi ki, Türkiyə hazır olacağı təqdirdə Ermənistan bu protokolları ratifikasiya etməyə hazırdır. Ümidvaram ki, bu proses tezliklə bərpa olunacaq”.
