Sentyabrın 30-da Ermənistan silahlı qüvvələrinin Basarkeçər rayonunun Zərkənd yaşayış məntəqəsi istiqamətindəki mövqeyindən Azərbaycan Ordusunun Kəlbəcər rayonunun Aşağı Ayrım yaşayış məntəqəsi istiqamətində yerləşən mövqeyinə snayper silahından açılan atəş nəticəsində şəhid olan hərbi qulluqçumuz Orucov Vüsal Xeybalı oğlu Qusar rayonunda dəfn olunub.
"Report"un Şimal bürosu xəbər verir ki, şəhid Suvacal kənd qəbiristanlığında torpağa tapşırılıb.
Dəfn mərasimində Qusar Rayon İcra Hakimiyyətinin rəhbərliyi, hüquq-mühafizə orqanlarının əməkdaşları və rayon ictimayyəti iştirak ediblər.
Şəhidin tabutuna sarılmış üçrəngli bayrağı V.Orucovun atasına təqdim olunub.
Qeyd edək ki, V.Orucov 2005-ci ildə Suvacal kəndində anadan olub. Hərbi xidmətə bu il aprel ayında yollanmışdı.
