Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyində **Beynəlxalq Miqrasiya Təşkilatının (BMqT) Azərbaycandakı Nümayəndəliyinin** rəhbəri Anar İskəndərov və nümayəndəliyin əməkdaşları ilə görüş keçirilib.
AZXƏBƏR.COM xəbər verir ki, görüşdə həssas miqrantların, eləcə də readmissiya və repatriasiya olunmuş şəxslərin sosial müdafiəsinin gücləndirilməsi istiqamətində əməkdaşlıq məsələləri müzakirə edilib.
Sosial Xidmətlər Agentliyinin İdarə Heyətinin sədri Vüqar Behbudov Agentliyin fəaliyyət istiqamətləri, həmçinin readmissiya və repatriasiya sahəsində həyata keçirilən tədbirlər barədə məlumat verib.
BMqT-nin Azərbaycandakı Nümayəndəliyinin rəhbəri Anar İskəndərov isə qeyd olunan istiqamətlər üzrə tərəflər arasında əməkdaşlığın daha da genişləndirilməsinin vacibliyini vurğulayıb.
Görüş zamanı readmissiya və repatriasiya olunmuş şəxslərin ehtiyaclarının qiymətləndirilməsi, onlara göstərilən sosial-psixoloji dəstəyin və reinteqrasiya tədbirlərinin təkmilləşdirilməsi, həmçinin zərərçəkmiş şəxslərlə iş sahəsində institusional potensialın artırılması istiqamətində birgə fəaliyyət imkanları ətrafında fikir mübadiləsi aparılıb.
