Alimlər süni intellektin (Sİ) bəşəriyyətin zəif tərəflərindən istifadə edərək qlobal fəlakətə necə səbəb ola biləcəyini açıqlayıblar.
Alimlər getdikcə daha az nəzərə çarpan bir təhlükəyə – insan qabiliyyətlərinin tədricən zəifləməsinə diqqət çəkirlər.
Tədqiqatçıların fikrincə, süni intellektin bəşəriyyət üçün potensial təhlükəsi maşınların üsyanı ilə bağlı ssenarilərdən daha fərqli ola bilər.
Mütəxəssislər xəbərdarlıq edirlər ki, insanların gündəlik işlərini və düşünmə tələb edən tapşırıqları getdikcə daha çox süni intellektə həvalə etməsi onların tənqidi düşünmə, planlaşdırma və müstəqil qərarvermə bacarıqlarını zəiflədə bilər.
İnsanlar intellektual və gündəlik fəaliyyətlərdə texnologiyalara daha çox güvəndikcə müstəqilliklərini itirə, mürəkkəb problemləri süni intellektin köməyi olmadan həll etməkdə çətinlik çəkə bilərlər.
Mütəxəssislər süni intellektin yarada biləcəyi təhlükələrin mümkün ssenarilərini müxtəlif cür qiymətləndirirlər.
Bəziləri nəzarətdən çıxmış süni intellekt sisteminin elektrik şəbəkələri və atom elektrik stansiyaları da daxil olmaqla kritik infrastruktura çıxış əldə edə biləcəyindən ehtiyatlanırlar.
Digərləri isə süni intellektin təsadüfən nüvə münaqişəsinə səbəb ola biləcəyini və ya təhlükəli xəstəlik törədicilərinin hazırlanmasına kömək edə biləcəyini düşünürlər.
Beləliklə, alimlərin xəbərdarlığına əsasən, süni intellektin bəşəriyyət üçün ən böyük təhlükəsi mütləq robotların insanlara qarşı üsyanı olmaya bilər. İnsanların düşünmək, qərar vermək və problemləri müstəqil həll etmək bacarıqlarını tədricən itirməsi də ciddi risk kimi qiymətləndirilir.
///lent.az///
