Suriya Azadlıq Ordusunun hərbi uğurlar qazanan ən böyük qruplaşması terrorçu təşkilat siyahısına salındıABŞ müxalif Suriya Azadlıq Ordusunu şoka salan qərar verib. Dekabrın 10-da ABŞ hökuməti Suriya Azadlıq Ordusunun əsas zərbə qüvvəsi sayılan “Cabat an-Nusra” qruplaşmasının terrorçu təşkilatlar siyahısına salıb.ABŞ Suriyadakı Cabat an-Nusra” qruplaşmasını “Əl-Qaidə” terror təşkilatının İraqdakı qolunun bir hissəsi sayır. “Cabat an-Nusra” qruplaşması Suriyada Bəşər Əsəd rejiminə qarşı döyüşən müxalif koalisiyada ən aqressiv və ən ciddi uğurlar qazanan silahlı birləşmədir. Bu qruplaşma yanvar ayında Dəməşqdə keçirdiyi bir sıra uğurlu əməliyyatlarla diqqət mərkəzinə düşüb. “Cabat an-Nusra” Suriya ordusunun Baş Qərargahında uğurlu reyd keçirib, Hələbdə Zabitlər Klubunda partlayış törədib, nəhayət, dekabrın 9-da Suriya ordusunun 3 briqadasını sıxışdıraraq strateji Dəməşq-İordaniya şosesinə nəzarəti ələ keçirib.Qruplaşmanın tərkibində İraq, Liviya, Türkmənistan, Qazaxıstan, Fransa və Böyük Britaniyadan gələn çoxlu sayda cihadçılar da döyüşür. “Cabat an-Nusra” qruplaşmasının sıralarında 10 mindən çox döyüşçü cəmləşib. Son vaxtlar Suriya ordusunun bir neçə hərbi bazasını ələ keçirən “Cabat an-Nusra”-nın nəzarətində tanklar və “İqla” zenit-raket kompleksləri də var. Qazandığı hərbi uğurlar “Cabat an-Nusra” qruplaşmasının sıralarına qoşulan könüllü döyüşçülərin də sayının sürətlə artmasını şərtləndirir.“Cabat an-Nusra” qruplaşmasının terrorçu təşkilatlar siyahısına salınması o deməkdir ki, ABŞ vətəndaşları bu təşkilatla əlaqə qura və bu təşkilatı maliyyələşdirə bilməz. ABŞ hökumətinin qərarı Suriya Azadlıq Ordusunun rəhbərliyini də qəzəbləndirib. Ən ciddi uğurlar qazanan hərbi qruplaşmanın terrorçu siyahısına salınması səbəbindən Suriya Azadlıq Ordusu əhalini bu həftə cümə namazından sonra anti-ABŞ xarakterli aksiyalar keçirməyə çağırıb.
