ARDNŞ-nin baş ofisində Almaniya nümayəndə heyəti ilə görüş olub. Şirkətin sərmayələr və marketinq üzrə vitse-prezidenti Elşad Nəsirov qonaqları səmimi salamlayaraq, Azərbaycanla Almaniya arasında əlaqələrin yüksələn xətlə inkişaf etdiyini, belə görüşlərin ölkələr arasında münasibətlərin inkişafında mühüm rol oynadığını qeyd etmişdir.ARDNŞ-dən verilən məlumata görə, səmimi qəbul üçün təşəkkürünü bildirən Almaniya Bundestaqının və Avropa Şurası Parlament Assambleyasının keçmiş üzvü Eduard Lintner bildirmişdir ki, nümayəndə heyətində Avropa Parlamentində Almaniya Federativ Respublikasını təmsil edən deputatlar, Almaniyanın federal və torpaq parlamentlərinin deputatları, habelə nüfuzlu ictimai-siyasi xadimlər, hüquqşünaslar və jurnalistlər təmsil olunurlar. ARDNŞ-nin vitse-prezidenti Elşad Nəsirov Azərbaycanda neftçıxarma işinin zəngin tarixə malik olduğunu, Bakı neftçilərinin dünya neft sənayesinin inkişafına əvəzsiz töhfələr verdiyini diqqətə çatdırmış, bildirmişdir ki, dünyada sənaye üsulu ilə ilk neft quyusu ölkəmizdə qazılmış, neftin tankerlərlə, dəmir yolu ilə, boru kəmərləri ilə nəql edilməsinə, emal olunmasına, sahildə, açıq dənizdə, Xəzərin dərinsulu hissələrində neft yataqlarının kəşfiyyatına və istismarına ilk dəfə Azərbaycanda başlanılmışdır. Qeyd olunmuşdur ki, əsası xalqımızın ümummilli lideri Heydər Əliyev tərəfindən qoyulmuş və hazırda Azərbaycan Respublikasının Prezidenti İlham Əliyevin rəhbərliyi altında uğurla davam etdirilən yeni neft strategiyası çərçivəsində həyata keçirilən regional və qlobal əhəmiyyətli layihələr üzrə böyük nailiyyətlər qazanılmış, qısa bir müddətdə şaxələndirilmiş ixrac boru kəmərləri sistemi yaradılmışdır. Bakı-Tbilisi-Ceyhan əsas ixrac neft və Bakı-Tbilisi-Ərzurum əsas ixrac qaz boru kəmərləri hazırda region və Avropa Birliyi ölkələrinin etibarlı enerji təchizatında əhəmiyyətli faktora çevrilmişdir.Ötən dövr ərazində neft-qaz sənayesi böyük inkişaf yolu keçmiş, bu sektorda tətbiq edilən yeni texnika və texnologiyalar karbohidrogen hasilatında artıma səbəb olmuşdur. Avropanın enerji təhlükəsizliyinə Azərbaycanın təbii qaz ixracatçısı olaraq verəcəyi töhfələrdən söz açan ARDNŞ rəsmisi qeyd etmişdir ki, “Şahdəniz” yatağının işlənilməsi ölkəmizin dünyada təkcə neft ixracatçısı kimi deyil, həmçinin təbii qaz istehsalçısı kimi tanınmasını təmin etmişdir. Azərbaycan qazının Avropa ölkələrinə nəqli məqsədi daşıyan TANAP və TAP layihələrinin beynəlxalq dəstək qazandığı vurğulanmış, artıq “Şahdəniz-2” layihəsi üzrə çıxarılacaq qaz həcmlərinin alıcıları olacaq Avropa şirkətləri ilə müqavilələrin imzalandıığı qonaqların diqqətinə çatdırılmışdır.
