“Bakcell” mobil operatoru haqda şikayətlər günü-gündən artmaqdadır.
Şirkətin rouminq xidmətiylə bağlı şikayətlər səngimək bilmir. Bir neçə həftə bundan öncə AZXEBER.COM xəbər portalında bu məsələyə yer ayrılmışdı. "‘Bakcell’ istifadəçilərin qəzəbinə səbəb oldu" başlıqlı xəbərdə Seymur Həsənov adlı oxucu yazırdı: “Mən Birləşmiş Ərəb Əmirliyində olduğum zaman “Bakcell”in rouminq xidmətindən istifadə etdim. Bakıdan çıxmadan öncə mənə yığım qaydaları ilə bağlı ismarıc göndərildi və operator mənə rominq xidmətindən istifadə etməyin yollarını başa saldı. Xaricdə olduğum zaman isə, bu kampaniyaların əslində bir yalan olduğunu anladım.Mənə göndərilən ismarıcda Azərbaycana zənglərin 1 dəqiqəsi 0,641 AZN, ölkədaxili zənglərin 1 dəqiqəsi 1,25 AZN, daxil olan zənglərə görə isə 0,641 AZN olduğu qeyd edilmişdi. Ancaq mən çox qısa zənglər edir və balansımı tez-tez yoxlayırdım. Ümumilikdə xaricdə olduğum 7 gün ərzində cəmi 4 dəqiqə danışdım və "Bakcell"in dediyi kimi olsaydı balansımda 20 AZN-dən çox pul qalmalı idi. Ancaq təəssüflər olsun ki, mənim balansım çox qısa müddət ərzində şirkətin yarıtmaz rouminq xidməti sayəsində 0 oldu”.
Bu dəfə də "Bakcell"in rouminq xidmətiylə bağlı şikayət daxil olub. Ancaq çox qəribədir ki, bu dəfə rouminq xidməti ölkə xaricində deyil, ölkə daxilində istifadəçilərə "ziyan" vurub.
Bu haqda AZXEBER.COM-a tanınmış jurnalist, "Xəzər" televiziyasının əməkdaşı Yusif Kərimli məlumat verib: "Mayın 15-də Qusarın Böyük Moruq kəndinə çəkilişə getmişdik. Kənd rayon mərkəzindən təxminən 30 km uzaqlıqda yerləşir. Mən telefonla zəng vuranda hələ rayondan yenicə çıxmışdıq və kəndə çatmamışdıq. İş yoldaşımla təxminən 5 dəqiqə danışdım. Mənə dedi ki, niyə gizli nömrədən zəng vurusan, nömrən görünmür. Üstəlik səslər çox gec gəlirdi. Danışığı bitirəndən sonra məlum oldu ki, balansımda olan 10 manatdan çox pulun 9 manata qədəri çıxılıb. Bakıya gələndən sonra abunəçisi olduğum Bakcell şirkətinin 555 müştəri xidmətləri nömrəsi ilə əlaqə saxladım. Dedilər ki, həmin vaxt sizin nömrənizin rouminq xidməti aktiv olub. Çünki ərazi Rusiya Federasiyasının Dağıstan Respublikasına yaxındır və yəqin ki, ordakı mobil operatorlardan birinə yönləndirilib. Şirkətin nümayəndələri bu sözü ela rahatlıqla deyirdilər ki, sanki, burda qeyri-adi heç bir şey yoxdur.
Ölkə ərazisini tərk etmədən, sərhədi keçərək qonşu respublikaya getmədən, Azərbaycan kəndində rouminq xidməti aktiv olur və balansınız sıfırlanır. İradımı bildirəndə isə Bakcell-in nümayəndəsi yenə məni borclu çıxardı. Dedi ki, gərək rouminq xidmətinin avtomatik funksiyasını söndürəydiniz. Mən isə əlavə etdim ki, ölkəni tez-tez tərk etdiyim üçün rouminq xidmətinin avtomatik funksiyasından istifadə edirəm. Amma bu xidmət ölkə ərazisini tərk edəndən sonra işimə yarayır. Rouminqin mahiyyəti də ölkə xaricində yerli nömrəndən istifadə edə bilmək imkanı deməkdir. Amma bu dəfə ölkəmin içində bu xidmət aktiv olub və mənə böyük olmasa da maddi ziyan dəyib. Mən isə daha çox istifadə etdiyim mobil operatorun müştərinin rahatlığından çox narahatlığına səbəb olmasına üzülürəm. Amma danışdığım Bakcell əməkdaşı indiki halda heç bir kömək edə bilməyəcəyini dedi. Bildirdi ki, sadəcə müştəri xidmətlərinə ərizə ilə müraciət edə bilərəm. Amma bu halda da balansımdan silinən məbləğ geri qaytarılmayacaq. Mənim isə mövqeyimi həmin əməkdaşa söyləməkdən başqa çarəm qalmadı. Dedim ki, balansımdan silinən məbləğin bərpa olunması məsələsindən çox sizin texniki imkansızlığınız müzakirə mövzusudur. Əgər qonşu ölkənin mobil operatoru mənim ölkəmin ərazisində hegemonluq edirsə, onun şəbəkəsi mənim istifadə etdiyim yerli şəbəkədən güclüdürsə, bu utancvericidir.
Əgər nömrəm Rusiyanın hansısa mobil operatoruna yönlənibsə bu o deməkdir ki, həmin vaxt mənim telefonum yerli şəbəkənin siqnalını tuta bilməyib. Halbuki olduğum ərazi Bakcell-in əhatə dairəsindədir. Əgər Bakcell müştərilərinə keyfiyyətli xidməti təmin edə bilmirsə, onun ötürücüləri qonşu ölkənin mobil operatorlarının ötürücülərinə məğlub olursa, onda bunu etiraf etsinlər. Yaxud müştəriyə dəyən ziyanı geri ödəsinlər. Amma təssüf ki, danışdığım əməkdaş bundan az da olsa narahat olmadı və kömək edə bilməyəcəyini təkrar söyləyərək sağollaşdı".AZXEBER.COM xəbər portalı qarşı tərəfin də fikrini yayımlamağa hazırdır.
