Türkiyənin "Habertürk” telekanalının keçmiş xəbər aparıcısı Nur Köşker kanalın keçmiş baş redaktoru Mehmet Akif Ersoy haqqında diqqətçəkən açıqlamalar verib.
AZXEBER.COM Türkiyə mediasına istinadən xəbər verir ki, spiker kanalda çalışdığı dövrdə Mehmet Akif Ersoy tərəfindən təcavüzə məruz qaldığını iddia edib.
"Karyeramın zirvədə olduğu bir vaxtda istefa vermək məcburiyyətində qaldım. Daha sonra ölkəni tərk etdim. Həmin adama görə qitə dəyişdim”-, deyə spiker vurğulayıb.
Aparıcı qeyd edib ki, baş redaktor ona əxlaqsız təkliflər edib:
"Mənim evli olduğum dövrdən başlayan və çox uzun müddət davam edən bir təcavüz prosesi var idi. Məsələn, liftin qapısını tutub hansısa hərəkətlər, davranışlar və s. edirdi. Sonra atdığı mənasız mesajlar var idi: ‘Səhər bülletenində LED-in qabağına keç. Ayaqlarını görüm. Masanın arxasına gizlədiblər’ və sair. Belə bir baş redaktor ola bilərmi, ya? Sonra o ən əsas, bomba kimi olan hissə…”.
Aparıcı deyib ki, onu efirdən uzaqlaşdırmaqla hədələyiblər:
"Məni "Oturub masada xəbər yazarsan” deyərək efirdən almaqla hədələmişdi. Bu barədə sübutum yoxdur. Bunun deyəcəyini bilsəydim, o otağa mütləq səs yazısı alaraq girərdim. Sonrasında mən onu başa düşdüm. Dedim ki, məsələni belə həll edək — mən istefa verim, gedim’ dedim və işdən çıxdım.”
Qeyd edək ki, "Habertürk”ün baş redaktoru Mehmet Akif Ersoy narkotik maddələrlə bağlı aparılan istintaq çərçivəsində saxlanılıb. O eyni zamanda evində seksual partilər təşkil etməkdə ittiham edilir.
Şahanə Ziyad
