Smartfon istifadəçilərinin ən çox qarşılaşdığı problemlərdən biri yaddaşın səbəbi aydın olmadan dolmasıdır. Bir çox hallarda istifadəçilər yeni şəkil və ya tətbiq yükləyə bilmədikdə problemin səbəbini fotolar və videolarda axtarsalar da, mütəxəssislər bildirirlər ki, yaddaşı dolduran əsas amillərdən biri "görünməz” fayllardır.
AZXEBER.COM xəbər verir ki, İT mütəxəssislərinin sözlərinə görə, bu fayllara tətbiqlərin keş (cache) məlumatları, müvəqqəti sistem faylları, mesajlaşma proqramlarında avtomatik yüklənən media, köhnə yeniləmə paketləri və istifadə olunmayan tətbiqlərin saxladığı məlumatlar daxildir.
Bu məlumatlar zaman keçdikcə toplanaraq telefonun yaddaşında bir neçə, hətta onlarla giqabayt yer tuta bilər.
Mütəxəssislər qeyd edirlər ki, ilk növbədə telefonun yaddaş bölməsi yoxlanılmalı, hansı tətbiqin daha çox yer tutduğu müəyyən edilməlidir. Daha sonra həmin tətbiqlərin keş faylları təhlükəsiz şəkildə təmizlənə bilər. Bununla yanaşı, uzun müddətdir istifadə olunmayan proqramların silinməsi, mesajlaşma tətbiqlərində avtomatik media yükləmə funksiyasının məhdudlaşdırılması və bulud yaddaş xidmətlərindən istifadə edilməsi tövsiyə olunur.
Ekspertlər xəbərdarlıq edirlər ki, istifadəçilər internetdə təqdim olunan naməlum "telefon sürətləndirici” və ya "təmizləyici” tətbiqləri ehtiyatla seçməlidirlər. Bu tip proqramlar hər zaman effektiv olmur, bəzi hallarda isə əlavə reklamlar göstərərək və ya lazımsız icazələr tələb edərək təhlükəsizlik riskləri yarada bilər.
Şahanə Ziyad
