İddiaya görə, ABŞ Prezidenti Donald Trampın Rusiya-Ukrayna müharibəsini 100 günə bitirmək planı bir xəbər təşkilatına sızdırılıb.
AZXEBER.COM Qərb mediasına istinadən xəbər verir ki, sızdırılan plana görə, Tramp hər iki lideri ayrı-ayrılıqda danışıqlar aparmağa razı saldıqdan sonra ümumilikdə 100 gün davam etməsi nəzərdə tutulan prosesə başlayacaq.
Buna görə də ən geci aprel ayının sonuna qədər iki ölkə arasında silahların susdurulması gözlənilir.
Ukrayna Prezidenti Volodimir Zelenskinin ofisi planı təkzib edərək, bunun əsassız olduğunu bildirib.
Fevral və ya mart aylarında həm Putin, həm də Zelenski görüşməli və aprelin 20-nə təsadüf edən Pasxa bayramı ilə cəbhə xəttində atəşkəs elan edilməlidir.
Atəşkəs elan edildikdən sonra Ukrayna qoşunları da Kurskdan çıxarılacaq və Beynəlxalq Sülh Konfransı digər qlobal güclərin vasitəçiliyi ilə müharibəni dayandırmaq üçün sazişin yaradılması üzərində işə başlayacaq.
Mayın 9-da müharibənin başa çatması üçün razılaşdırılmış şərtlərlə bağlı bəyanat dərc olunacaq, bundan sonra Kiyevdən hərbi vəziyyəti uzatmamaq və səfərbərlik elan etməmək istəniləcək.
Ukrayna da ordusunun sayını saxlayacaq və ABŞ-dən hərbi dəstək almağa davam edəcək.
Rusiyaya qarşı bəzi sanksiyaların ləğvi ideyası da qeyd olunub.
İddialara görə, Rusiyanın enerji resurslarının Aİ-yə idxalına qoyulan məhdudiyyətlər aradan qaldırılacaq, onlara qarşı xüsusi vergilər tətbiq olunacaq və vəsaitlər Ukraynanın yenidən qurulmasına yönəldiləcək.
Qeyd edək ki, Zelenski daha əvvəl Trampın sülh planını rədd etmişdi.
