Xəbər verdiyimiz kimi, martın 8-i bir qrup feminist Bakının mərkəzində icazəsiz aksiya təşkil etməyə cəhd edib. Aksiyanın qarşısının alınması üçün hadisə yerinə polis əməkdaşları cəlb olunub, nəticədə feministlər həmin ərazidən uzaqlaşdırılıb.
AZXEBER.COM feministlərin icazəsiz aksiyası ilə bağlı Ağ Partiya sədri Tural Abbaslının mövqeyini öyrənib.
Partiya sədri bu cür aksiyaları mənfi qarşıladığını və lazımsız olduğunu bildirib:
"Mən bu hadisəyə iki konseptdən yanaşacam. Birincisi ölkədə pandemiya dövrünün davam etdiyi bir vaxtda şəhərdə kütləvi toplaşma təşkil etməklə karantin qaydalarını pozmaqla yanaşı bu, yoluxma hallarının artımına səbəb ola bilər. Məlumdur ki, bütün dünya hazırda pandemiyayla mübarizə aparır, belə vaxtda bu cür aksiyalar təşkil etmək lazımsızdır.
İkinci isə feministlərin tələb etdiyi qadın azadlığı məsələsidir. Onu deməliyəm ki, Avropa ilə müqayisə etdikdə Azərbaycanda da qadın hüquqları qorunur. Hətta Şərqdə qadına ilk seçki hüququnun verildiyi ölkənin Azərbaycan olduğu da məlumdur. Bu baxımdan da bu cür aksiyalara lüzum yoxdur".
Tural Abbaslı öz fikirlərinə bunları da əlavə edib: "Gender bərabərliyi olmur, kişi və qadın hüquqlarının müdafiəsinin bərabərliyi olur. Yəni, hüquqların müdafiəsi dedikdə bunların eyni olduğunu düşünürəm".
Aydın Nuri,
AZXEBER.COM
AZXEBER.COM
