"Turan” voleybol klubunun prezidenti Həsən Zeynalov komandanın Çempionlar Liqasındakı ilk oyunu ilə bağlı fikirlərini bölüşüb.
AZXEBER.COM xəbər verir ki, o bildirib ki, bu qarşılaşma həm Azərbaycan, həm də Tovuz idmanı üçün mühüm əhəmiyyət daşıyır:
"Sabah bizim üçün çox böyük və əlamətdar gündür. Deyərdim ki, bu, həm Azərbaycan, həm də Tovuz üçün tarixi hadisədir. Çünki Çempionlar Liqasında ilk oyunumuzu keçirəcəyik. Bu qarşılaşmanın gələcək uğurlarımızın başlanğıcı olacağına inanırıq. Əsas hədəfimiz qrup mərhələsində uğurlu çıxış etmək və növbəti mərhələyə yüksəlməkdir”.
Klub prezidenti komandanın hazırlıq vəziyyətindən və qarşıdakı oyundan gözləntilərindən də danışıb:
"Avropa yarışlarında təcrübəmiz az olsa da, komandamıza inanırıq. Hazırlıqlarımız davam edir, qarşıda son məşqimiz qalıb. Oyunçularımızda həyəcan var. Ümid edirik ki, sabah meydanda yaxşı mübarizə aparacaq və azarkeşlərimizi sevindirəcəyik”.
Həsən Zeynalov komandaya yeni cəlb olunan oyunçularla bağlı da fikirlərini açıqlayıb. O, transferlərin baş məşqçinin istəkləri nəzərə alınaraq həyata keçirildiyini və yeni oyunçulardan razı qaldıqlarını bildirib.
Şahanə Ziyad
