‘Türkmənçay müqaviləsinə yenidən baxılsa, gərək İran Azərbaycana birləşdirilsin’

Bütün Xəbərlər

10:08 10.04.2013

1390

Mübariz Qurbanlı: “Bu müqavilənin şərtlərinə əsasən, Azərbaycan xalqı, dövləti iki yerə bölünüb”

"Bəzi dairələr bütövlükdə İranın milli maraqlarına ziyan vuran və müasir dünya və tarix ilə uzlaşmayan çıxışlar edirlər və bu çıxışların da zərərini İran hakimiyyəti, o cümlədən İran dövləti çəkmək zorunda qalır". Bunu milli.az-a İran parlamentinin bir sıra üzvlərinin Türkmənçay müqaviləsinə yenidən baxılmasını və Azərbaycan ərazilərinin yenidən İrana birləşdirməsini nəzərdə tutan qanun layihəsi hazırlamasına münasibət bildirərkən Azərbaycan-İran parlamentlərarası işçi qrupunun üzvü, hakim Yeni Azərbaycan Partiyasından olan deputat Mübariz Qurbanlı deyib. "Çox təəssüf ki, parlamentdə təmsil olunan belə şəxslər, əgər dövlətdə rəsmi vəzifəsi varsa, ikiqat təəssüf ki, müasir dünyanı və müasir prosesləri anlamırlar. Dövlətlərin ərazi bütövlüyü, toxunulmazlığı var, BMT səviyyəsində tanınmış ərazilər var, bunları hamı qəbul edib, o cümlədən İran da qəbul etməlidir", - deyə Qurbanlı bildirib. Deputatın sözlərinə görə, Rusiya ilə İran arasındakı müharibələr 1813-cü və 1828-ci ildə Gülüstan və Türkmənçay müqavilələri ilə nəticələnib və Türkmənçay müqaviləsi də bu gün hamı tərəfindən tanınan müqavilədir. "Bu müqavilənin şərtlərinə əsasən, Azərbaycan xalqı, dövləti iki yerə bölünüb. Əslində həmin müharibə getdiyi dövrdə də, həmin müqavilə imzalandığı zamanda da İranı idarə edən azərbaycanlılar idi. Şah da azərbaycanlı idi, bu müqaviləni İran tərəfindən imzalayan Abbas Mirzə də azərbaycanlı idi və bu müharibə də əslində Azərbaycan xalqını iki yerə bölüb. Bu müqaviləyə yenidən baxmalı olsaq, gərək onda İran Azərbaycana yenidən birləşdirilsin və İranın özünün idarəçiliyi də azərbaycanlılara verilsin. Bu tarixə bu cür yanaşmaq, özünü gülünc vəziyyətə salmaqdan başqa bir şey deyil", - deyə YAP rəsmisi bildirib.