Yanvarın 14-ü Kiçik və Orta Biznesin İnkişafı Agentliyi (KOBİA), "Marsol Group” və İş Adamları Cəmiyyətinin Milli Assosiasiyasının (İCMA) birgə təşkilatçılığı, "Birbank Biznes”in rəsmi tərəfdaşlığı ilə 3-cü dəfə "Uğurlu tərəfdaşlıqda xanım sahibkarlar” layihəsinə start verilib.
AZXEBER.COM xəbər verir ki, bu məqsədlə "Bakı KOB evi”ndə keçirilən tədbirdə layihənin təşkilinə dəstək göstərən təşkilatların nümayəndələri və qadın sahibkarlar iştirak ediblər.
Tədbirdə KOBİA-nın İdarə Heyətinin sədri Orxan Məmmədov və İş Adamları Cəmiyyətinin Milli Assosiasiyası (İCMA) İdarə Heyətinin sədri və Marsol Group-un təsisçisi Tural Mustafayev çıxış edərək ölkəmizdə qadın sahibkarlığın inkişafına dəstək tədbirləri, bu sahədə özəl sektorun təşəbbüsləri və layihə barədə ətraflı məlumat veriblər. Bildirilib ki, artıq üçüncü ildir keçirilən layihənin məqsədi qadın sahibkarların iqtisadi və sosial həyatda fəallığının artırılması və onlar arasında işgüzar əlaqələrin genişləndirilməsidir. Builki layihədə müxtəlif sektorları təmsil edən 100-dən çox qadın sahibkar iştirak edəcək. Layihə çərçivəsində müxtəlif mövzularda təlim, seminar və master klaslar, işgüzar görüşlər, ofis-istehsalat ziyarətləri və sosial fəaliyyətlər təşkil ediləcək.
Tədbirin davamında layihə ilə bağlı video çarxlar nümayiş olunub, həmçinin builki layihənin baş sponsoru "Məlhəm Beynəlxalq Hospital”ın rəhbəri Sevda Əlizadə, layihə iştirakçısı "İNDO” İctimai Birliyinin sədri Zöhrə Həsənova və "FFF+N” şirkətinin təsisçisi Tacirə İslamova çıxış edərk layihə ilə bağlı öz fikirlərini bildirib və təşkilatçılara təşəkkür ediblər.
Qeyd edək ki, "Uğurlu tərəfdaşlıqda xanım sahibkarlar” layihəsi 2024-cü ildən icra olunur. Builki layihənin baş sponsoru "Məlhəm Beynəlxalq Hospital”, sponsoru "Corian Baku”, tərəfdaşları "Ətirşah Parfüm” və "Gizli Bahçe” restoranı, promo tərəfdaşı isə "Moon Group”dur. Layihənin bu ilin mart ayında başa çatdırılması nəzərdə tutulub.
