Türk-amerikalı kimyaçı və polimerlər üzrə mütəxəssis Ergün Kırlıkovalı amerikalı risk tədqiqatçısı Nassim Nikolas Talebə açıq məktub ünvanlayaraq, onun Ruben Vardanyanı dəstəkləməsini və Vardanyan həbsdə olduğu müddətdə Bakıda mühazirə oxumaqdan imtina etməsini sərt tənqid edib. Kırlıkovalı Talebi Vardanyanın fəaliyyətini yanlış qiymətləndirməkdə ittiham edib, onun xeyriyyəçi imicinin arxasında qanunsuz maliyyə fəaliyyəti və geosiyasi məqsədlərin dayandığını iddia edərək mövqeyini yenidən nəzərdən keçirməyə çağırıb.
Məktub müəllifi həmçinin iddia edib ki, Vardanyanın 2022-ci ilin sonunda Qarabağa gəlməsi regionda sabitliyin pozulmasına səbəb olub. O, Bakı Hərbi Məhkəməsinin 2026-cı ilin fevralında Vardanyanı terrorçuluğun maliyyələşdirilməsi və qanunsuz silahlı birləşmələrin yaradılması da daxil olmaqla müxtəlif ittihamlarla 20 il azadlıqdan məhrum etdiyini xatırladıb.
Milli Məclisin deputatı Elçin Mirzəbəyli AZXEBER.COM-a açıqlamasında deyib ki, Ergün Kırlıkovalının Nassim Nikolas Talebə ünvanladığı məktub obyektiv həqiqətləri əks etdirir:
"Ergün Kırlıkovalının Nassim Nikolas Talebə ünvanladığı məktub obyektiv həqiqətləri əks etdirir. Amma bu, Nassim Talebin mövqeyində əsaslı bir dəyişikliyə səbəb olmayacaq. Çünki Livanda doğulan Nassim Taleb nəticə etibarilə bütün ömrü boyu erməni diasporu və erməni kilsəsi ilə sıx bağlı olub.
Onun Ruben Vardanyanla əlaqələrinin kökündə də məhz bu faktorlar dayanır. Livanın paytaxtı Beyrutda erməni Kilsəsini maliyyələşdirən və həmçinin bu kilsə vasitəsilə vaxtilə Azərbaycan ərazilərində qanunsuz məskunlaşmasına faktiki olaraq dəstəkləyən şəxslərdən biri də Ruben Vardanyan idi. Bu prosesdə Ermənistanda həbsdə olan Samvel Karapetyan və Azərbaycanda cinayət əməllərinə görə həbsdə olan Ruben Vardanyan paralel şəkildə hərəkət ediblər. Bu şəbəkənin içərisində Nassim Talebin də olması qətiyyən təsadüfi deyil”
O bildirib ki, çirkli pulların yuyulması ilə məşğul olan bir şəxsin iqtisadi kataklizmlərə səbəb olan hadisələr haqqında nəzəriyyənin müəllifi ilə bir araya gəlməsi paradoksal haldır:
"Maraqlıdır ki, Taleb "Qara qu quşu” iqtisadi nəzəriyyəsini irəli sürən şəxslərdən biridir. Əslində, bu nəzəriyyənin mahiyyətində yer alan faktorlardan biri də Ruben Vardanyan kimi şəxslərin fəaliyyətidir. Nəticə etibarilə, Ruben Vardanyan uzun illər boyu çirkli pulların yuyulması ilə məşğul olub. Hətta onun rəhbərlik etdiyi bankı "camaşırxana” adlandırıblar.
Nəticə etibarilə, Ruben Vardanyan haqqında bir neçə cinayət işi var. O cümlədən, Baltikyanı ölkələrdə fəaliyyəti ilə bağlı da cinayət işləri açılıb. Onun adı dəfələrlə çirkli pulların yuyulması ilə bağlı hallanıb.
Əslində, çirkli pulların yuyulması ilə məşğul olan bir şəxsin məhz bu cür iqtisadi kataklizmlərə səbəb olan hadisələr haqqında nəzəriyyənin müəllifi ilə bir araya gəlməsi paradoksal haldır. Amma biz erməni diasporu və erməni lobbisi ilə bağlı olan şəxslərin fəaliyyətində bu cür paradoksal hallarla tez-tez rastlaşırıq”.
Şahanə Ziyad
