Xəbər verdiyimiz kimi, Medianın İnkişafı Agentliyinin (MEDİA) keçirdiyi sorğunun nəticələrinə əsasən, Prezident İlham Əliyevə rəyi soruşulanların 87,7 faizi etimad göstərdiyini bildirib.
Sorğu iştirakçılarının 93,6 faizi dövlət başçısının fəaliyyətini müsbət qiymətləndirib, 81,9 faizi isə onu alternativsiz siyasi lider hesab etdiyini qeyd edib.
AZXEBER.COM mövzu ilə bağlı Milli Məclisin deputatı, Milli Cəbhə Partiyasının sədri Razi Nurullayevin mövqeyini öyrənib.
Deputat bildirib ki, vətəndaşların əksəriyyəti problemlərinin həlli ilə bağlı ən çox Prezidentə ümid edir:
"Sorğunun nəticələri cəmiyyətin böyük hissəsinin Prezident İlham Əliyevə etimad göstərdiyini nümayiş etdirir. Müxalifət olaraq biz bu reallığı qəbul edirik və insanların iradəsinə hörmətlə yanaşırıq. Seçicilərlə keçirdiyim çoxsaylı görüşlər də göstərir ki, vətəndaşların əksəriyyəti problemlərinin həlli ilə bağlı ən çox Prezidentə ümid edir və əsas gözləntilərini onun fəaliyyəti ilə əlaqələndirir”.
Razi Nurullayev hesab edir ki, bu etimad və gözlənti daha böyük məsuliyyət yaradır:
"İnsanların etimadını doğrultmaq üçün sosial rifahın yüksəldilməsi, məşğulluğun artırılması, gəlirlərin artması, sahibkarlıq mühitinin yaxşılaşdırılması, ədalətli idarəetmənin gücləndirilməsi və vətəndaşları narahat edən gündəlik problemlərin həlli istiqamətində daha intensiv və sistemli iş aparılmalıdır.
Əlbəttə, proqramlar qəbul edilir, işlər görülür, dövlət başçısı səviyyəsində siyasi iradə də var. Cəmiyyətin əsas gözləntisi də məhz aparılan siyasətin konkret nəticələrə çevrilməsidir”.
Fəridə Əsədzadə
