"Yol nəqliyyat hadisələri zamanı ölənlərin sayı il ərzində 1200 nəfərə çatıb. Bu məsələ bizi narahat edir". Bunu ədliyyə naziri Fikrət Məmmədov Ali Məhkəmənin Plenumunda bildirib.
Onun sözlərinə görə, son 10-12 ildə nəqliyyat vasitələrinin sayının 2,5 dəfə artması və qaydalara əməl edilməməsi yol qəzalarının sayının artmasına təsir edir: "Yol nəqliyyat hadisələri ilə bağlı cinayətlərin sayı 2001-ci ildə ümumi cinayətlərin 3,4 faizini, 2006-cı ildə 6, 2012-ci ildə isə 12 faizini təşkil edib".
Nazir qeyd edib ki, cəzaçəkmə müəssisələrində yol nəqliyyat hadisələri ilə bağlı törədilmiş cinayətlərə görə saxlanılan məhkumların sayı 7 dəfə artaraq ümumi məhkumlarının sayının 15 faizinə çatıb: "Məhkəmələrdə bununla bağlı vahid təcrübə olmaması səbəbindən yerli instansiya məhkəmələrində verilən qərarların 45 faizi apelyasiya məhkəmələri tərəfindən ləğv olunub".
Onun sözlərinə görə, ötən dövrdə yol verdiyi nöqsanlara görə 4 hakimin fəaliyyətinə xitam verilib, 6 hakimin iş yeri dəyişirilib, 39 hakim isə ciddi intizam məsuliyyətinə cəlb edilib: "Bütün bunlar qanunvericilikdə müəyyən dəyişiklərin qəbul edilməsinə zərurət yaradır".(TREND)
