27 Noyabr 2011 tarixində “Atropat” Otelində ÖZ Klubun təqdimatı keçirildi. AZXEBER.COM-un verdiyi məlumata görə, təqdimatda müxtəlif sahələrdən olan gənclər, eləcə də öndə gedən biznes qurumların nümayəndələri, HR, marketinq mütəxəssisləri və müxtəlif universitetlərin Tələbə Gənclər Təşkilatlarının nümayəndələri iştirak etdi. Burada ÖZ Klubun əsas fəaliyyət istiqamətləri, missiyası, hədəfləri, dekabr ayına klub üzvləri üçün nəzərdə tutulmuş məhsul və xidmət paketləri, kluba üzvlük şərtləri, klub kartı barədə təqdimatlar olundu, gənclərin suallarına cavab verildi və təklifləri nəzərə alındı. Müxtəlif sferalarda öz sözlərini demiş gənc iş adamlarına, mütəxəssislərə fikir və təcrübələrini bölüşmələri üçün söz verildi. Püşkatma nəticəsində 10 bəxtəvər nömrənin sahibi ÖZ Klub Kartının ilk 10 sahibinə çevrilmiş oldu və bu kartlar onlara hədiyyə olundu. Sonda təqdimat iştirakçıları ilə xatirə fotoları çəkildi.
Qısaca Klub barədə onu demək olar ki, ÖZ Klub özündə 5 Elementi əks etdirən fəaliyyət istiqamətinə malikdir:
- Education (Öyrənib Öyrətməl İmkanı)
- Entertainment (Sağlam Əyləncə)
- Experience (Real Təcrübə İmkanı)
- Explore (Yeni kəşflər)
- Earning (Qazanmaq İmkanı)
Əsas hədəf gənclərin arzu, istək və məqsədlərinə gedən yolda qarşılarına çıxan maneələri aradan qaldırmaq və daha geniş imkanlar təklif etməkdir. Bu imkanların hər birindən yararlanmaq üçün sadəcə gənc olmaq və ÖZ Klub Kartına sahib olmaq lazımdır.
ÖZ Klub qarşıdan gələn bir ay ərzində daha geniş kütləyə öz xidmətlərini təklif etməyi, yeni və iri layihələrin icrasını və daha çox gənci öz ətrafında birləşdirməyi qarşısına məqsəd qoyur.
