Məlum olduğu kimi, Ukrayna Prezidenti Volodimir Zelenski ABŞ Prezidenti Donald Trampla görüşmək üçün ABŞ-yə uçub.
O, bu gün Rusiya ilə hərbi münaqişənin həllinin mümkün variantlarını müzakirə etmək üçün Avropa liderləri ilə birlikdə Trampla görüşəcək.
Eyni zamanda, ümumi görüşdən öncə Trampın Zelenski ilə təkbətək görüşü planlaşdırılır.
Bəs, bugünkü görüş Ukrayna üçün nə vəd edir? Rusiya Ukraynaya ərazi məsələsində güzəştə gedəcəkmi? O cümlədən Tramp bu məsələnin həlli üçün hansı təkliflər verəcək?
Onu da əlavə edək ki, Zelenskinin son ABŞ səfəri uğurlu olmamışdı. Belə ki, danışıqlar erkən yekunlaşmış və Zelenski ABŞ-ni tərk etmişdi.
AZXEBER.COM-a açıqlama verən siyasi şərhçi Məhəmməd Əsədullazadə sözügedən görüşün əhəmiyyətindən danışıb:
"Bu gün Rusiya-Ukrayna müharibəsi fonunda ABŞ, Avropa və Ukrayna liderləri arasında görüş baş tutacaq. Görüşdə vacib məsələlərdən biri iki ölkə arasındakı torpaq mübadiləsi, xüsusilə Donbasın sülh müqaviləsi ilə Rusiyaya verilməsi nəzərdə tutulur. Burada atəşkəsin elan ediləcəyinə inanmıram. Düşünmürəm ki, Zelenski və Avropa liderləri də sülh müqaviləsinə görə ərazi məsələsində güzəştə getsinlər".
Siyasi ekspert əlavə edib ki, Zelenski ərazi məsələsini güzəştə getsə belə, Avropa liderləri buna imkan verməyəcək:
"Əgər Zelenski bu təklifi təsdiqləsə, ABŞ-nin Ukraynaya müəyyən hərbi yardımları dayana bilər, amma Avropa dövlətləri buna imkan verməyəcək. Çünki Ukraynanın ərazilərini Rusiyaya verməsi, eyni zamanda ABŞ-nin Rusiyaya qarşısında nüfuzunun zəifləməsi deməkdir. Göründüyü kimi, görüşlərdə Krım böhranı müzakirə edilmir. Hesab edirəm ki, danışıqlar baş tutmayacaq və Avropa liderləri düşünürlər ki, Tramp bu mövqeyindən geri çəkilsin".
Mikayıl Mirzəzadə
