Son illər telefon zənglərinin yerini getdikcə daha çox mesajlaşma tətbiqləri tutur.
AZXEBER.COM xəbər verir ki, bir vaxtlar gündəlik ünsiyyətin əsas vasitəsi olan səsli danışıq artıq bir çox insan üçün ikinci plana keçib. İndi əksəriyyət vacib məsələləri belə zənglə deyil, mesaj vasitəsilə həll etməyə çalışır.
Mütəxəssislərin fikrincə, bunun əsas səbəblərindən biri rahatlıqdır. Mesaj yazan şəxs cavabı dərhal verməyə məcbur olmur, fikrini düşünərək ifadə edə bilir. Zəng zamanı isə ani reaksiya vermək lazım gəlir ki, bu da xüsusilə gənclər arasında narahatlıq yaradır. Elmi araşdırmalar göstərir ki, sosial narahatlıq yaşayan insanlar səsli danışıqdan daha çox yazışmaya üstünlük verirlər.
Digər səbəb isə zaman amilidir. İnsanlar işdə, nəqliyyatda və ya ictimai yerlərdə olduqları üçün uzun telefon danışığı etmək əvəzinə qısa mesaj göndərməyi daha praktik hesab edirlər. Mesaj istənilən vaxt oxuna və cavablandırıla bilir.
Müşahidələr göstərir ki, xüsusilə Z nəsli üçün gözlənilməz telefon zəngi bəzən narahatlıq yaradır. Bir çox gənc əvvəlcə mesaj yazılmasını, daha sonra zəng edilməsini daha uyğun hesab edir.
Fəridə Əsədzadə
