"Qarabağ"ın bu mövsüm uğursuz çıxışına əslində bir səbəbdən deyil, bir neçə səbəb üzərindən fikir bildirmək olar. Mən düşünürəm ki, "Qarabağ" klubunda yeni dövr hazırda başlanıb və proses gedir. Bu ilin yazında "Braga" və "Bayer"lə nümayiş etdirilən super futboldan sonra azərkeşlərin gözləntiləri çox böyümüşdü və sadəcə bilmək lazım idi ki, "Qarabağ" bundan artığına fiziki, potensial olaraq qadir deyil".
Bu sözləri AZXEBER.COM-a açıqlamasında tanınmış idman mütəxəssisi, "Rekord.az" saytının təsisçisi Kənan Məstəliyev "Qarabağ" futbol klubunun son aylar ərzində Avrokuboklarda zəif təsir bağışlamasına münasibət bildirərkən deyib.
İdman mütəxəssisi qeyd edib ki, "Qarabağ"da kifayət qədər potensiallı futbolçular olsa da, biz onların builki uğurlu performanslarını görə bilmirik:
"Bu tempdə uzun müddət performans nümayiş etdirmək çox çətindir. Çünki "Qarabağ"ın heyəti bəllidir, yaxşı futbolçuları var, amma onların da potensialları bir yerə qədərdir. Eyni zamanda "Qarabağ"ın çıxış elədiyi ölkə çempionatında da o qədər rəqabət yoxdur deyə onlar da öz formalarını maksimalda saxlaya bilmirlər. Azərbaycan çempionatının zəif olması, daxili birincilikdə rəqabətin olmaması "Qarabağ"ın hazırkı nəticələrinə gətirib çıxardan səbəblərdəndir. O cümlədən heyətdəki oyunçuların artıq bir çoxunun əvvəlki formasından uzaq olması, lazımi gücü ortaya qoya bilməməsidir. Məsələn, Abdullah Zubirdi, Marko Veyşoviçdi. Biz gözlədiyimiz səviyyədə oynamırlar. Dünənki maçtda gördük ki, Yasin Benziya da o həvəsdə deyildi, xüsusilə dünənki maçtda o, performansından çox aşağı oynadı. Romao zatən ehtiyata düşür, ehtiyat oyunçusuna çevrilib, müdafiə xəttində boşluqlarımız var. Bədavi zədəlidir, amma oynayanda da səhvlərə yol verirdi, eyni zamanda digər futbolçularımız da onun kimi...".
Ekspert hesab edir ki, Qurban Qurbanov mövcud heyətlə artığını edir və ondan sonra gələn heç bir məşqçi onun etdiyini edə bilməyəcək:
""Qarabağ"da heyət dəyişikliyinə ehtiyac var. Burada baş məşqçidə bir problem görmürəm, çünki, Qurban Qurbanov bu heyətlə bundan artığını maksimum edir və bundan artığını mən düşünmürəm ki, hansı baş məşqçi gəlsə eder. Çünki dünənki oyunda da gördük ki, qurulan taktika öz effektini verirdi və biz "Lyon" kimi komandanı qapısına sıxmışdıq. Bir neçə epizodlar, real qol vəziyyətləri qaçdı, dirəklərdən toplar döndü, yəni bəxt bizim tərəfimizdə olmadı. Əvvəzindən rəqib əlinə düşən yarım şanslardan belə istifadə etdi və qələbə qazandı, çünki onlar çox güclü futbolçulardan təşkil olunmuş kollektivdirlər, təcrübəlidirlər. Əslində, bu yay iki nəfər alınıb. Addai və Aleksey Kaşukdan söhbət gedir, amma onlar hələ ki, o effekti vermirlər. Xüsusən, Addai o səviyyədə deyil".
Mikayıl Mirzəzadə
