Xəbər verdiyimiz kimi, Azərbaycan və Ermənistan vətəndaş cəmiyyətləri nümayəndələrinin İrəvanda ikitərəfli dəyirmi masası baş tutub.
Dəyirmi masada Azərbaycan tərəfini Fərhad Məmmədov, Rusif Hüseynov, Ramil İskəndərli, Kəmalə Məmmədova və Dilarə Əfəndiyeva, Ermənistan tərəfini isə Areq Koçinyan, Boris Navasardyan, Naira Sultanyan, Narek Minasyan və Samvel Meliksetyan təmsil ediblər.
Azərbaycanı təmsil edən Cənubi Qafqaz Tədqiqatlar Mərkəzinin direktoru Fərhad Məmmədov AZXEBER.COM-a açıqlamasında bildirib ki, dünən baş tutan görüşdə üçüncü tərəf iştirak etməyib:
"Bu görüş vətəndaş cəmiyyətinin nümayəndələrinin görüşü idi. Görüşə hər iki hökumət təşkilatçılıq baxımından səy göstərdi. Bildiyimiz kimi Azərbaycan Hava Yollarına məxsus təyyarə 30 ildən sonra ilk dəfə Ermənistanın paytaxtına eniş etdi. Görüş çərçivəsində bir çox məsələlər müzakirə edildi".
Fərhad Məmmədov İrəvandakı görüşün digər görüşlərdən fərqini belə izah edib:
"Onsuzda biz bəzi beynəlxalq tədbirlər çərçivəsində xarici təşklilatların təşkil etdiyi müzakirələrdə Ermənistandan olan ekspertlərlə görüşürük. Amma bu görüş ikitərəfli formatda baş tutdu. Burada nə təşkilatçılıq, nə təşəbbüs baxımından üçüncü tərəf iştirak etmədi".
Məmmədov qeyd edib ki, Vaşinqton görüşündən sonra hökumətlər qarşılqlı addımlar atır:
"Vaşinqton görüşü zamanı imzalanan birgə bəyanatdan sonra elə bir mühit formalaşıb ki, hökumətlər qarşılılı addımlar atır. Müəyyən dərəcədə birgə fəaliyyət təmin olunub. Elə bir tarixi şərait formalaşıb ki, təkcə vətəndaş cəmiyyəti deyil, həmçinin ekspert, media səviyyəsində birgə fəaliyyətin təşkili aktualdır. Belə olan halda bu dövrü qiymətləndirərək belə bir addım atıldı. Ümid edirik ki, bu format görüşlər davamlı olacaq və belə görüşlərin təşkili artıq normaya çevriləcək. İkitərəfli görüşlər diplomatik, iqtisadi və vətəndaş cəmiyyətinin dialoqu formatında qorunub-saxlanacaqdır".
Fərhad Məmmədov həmçinin bildirib ki, görüşlər bu ardıcıllıqla davam etsə, Ermənistan tərəfinin də Azərbaycana səfəri gözləniləndir:
"Bu görüş ikitərəfli formatda və Ermənistanın paytaxtında baş tutdu. Əgər bu fəaliyyət davam edəcəksə, təbii ki, onların da Azərbaycana səfəri nəzərdə tutulacaq”.
Günel Hüseynli
