IV ixtisas qrupu üzrə qəbul imtahanının hər iki mərhələsinin nəticələrinin cəminə əsasən ən yüksək göstəricini 700 bal toplayan Sumqayıt şəhəri Təbiət Elmləri Təmayüllü Gimnaziyanın məzunu Tağızadə Samir Hikmət oğlu əldə edib.
AZXEBER.COM-un əməkdaşı yüksək nəticə göstərən abituriyentlə əlaqə saxlayıb. Samir Tağızadə qazandığı uğurla bağlı təəssüratlarını saytımızla bölüşüb.
Müsahibənin təqdim edirik:
– 700 bal topladığınızı öyrənəndə ilk reaksiyanız necə oldu?
– İmtahanın nəticələri açıqlananda evdə ailəmlə birlikdə idim. Nəticəni görəndə hamımız çox sevindik. Bu, sözlə ifadə olunmayacaq qədər qürurverici və möhtəşəm bir hiss idi.
– Qəbul imtahanına necə hazırlaşırdınız?
– Hazırlıq kurslarına gedirdim və planlı şəkildə dərslərimi oxuyurdum. Qarşıma qoyduğum məqsədə çatmaq üçün müntəzəm çalışırdım.
– Hazırlıq dövründə sosial şəbəkələrdən istifadə edirdinizmi?
– Bəli, sosial şəbəkələrdən istifadə edirdim. Çox aktiv olmasam da, boş vaxtlarımda mobil telefonda oyunlar oynayırdım. Hesab edirəm ki, hazırlıq dövründə həm çalışmaq, həm də istirahət etmək vacibdir.
– Bu il imtahana hazırlaşan abituriyentlərə nə tövsiyə edərdiniz?
– Onlara çox çalışmağı tövsiyə edərdim. Amma bununla yanaşı, istirahətə də kifayət qədər vaxt ayırmaq lazımdır. Ən vacib məqamlardan biri vaxtı düzgün planlaşdırmaq və səmərəli istifadə etməkdir.
– Sizcə, 700 bal toplamağın sirri nədədir?
– Məncə, əsas sirr həm hazırlıq prosesində, həm də imtahan zamanı vaxtı düzgün idarə etməkdir. Dərslərə planlı yanaşmaq və imtahanda vaxt bölgüsünü düzgün qurmaq yüksək nəticə əldə etməyə kömək edir.
– Ailənizdə sizdən əvvəl yüksək nəticə göstərən olubmu?
– Bəli. Bacım məndən iki yaş böyükdür. O da qəbul imtahanında 654 bal toplamışdı.
– Hansı ixtisası seçməyi planlaşdırırsınız?
– Azərbaycan Tibb Universitetində Müalicə işi ixtisasını seçməyi planlaşdırıram.
Şahanə Ziyad
