BAKU AZƏRBAYCAN
6°C
euro 1.8398
dollar 1.7000
rubl 0.0224
lirə 0.2510

Abşeronda ötən ilin sosial-iqtisadi inkişafının yekunları və qarşıda duran vəzifələr müzakirə edilib - FOTOLAR

Abşeronda ötən ilin sosial-iqtisadi inkişafının yekunları və qarşıda duran vəzifələr müzakirə edilib - FOTOLAR
SOSİAL
17:50 24.02.2020
2213
FOTOLAR" />
Xırdalan şəhərindəki Heydər Əliyev Mərkəzində keçirilən rayon icra hakimiyyətinin geniş şura iclasında 2019-cu ildə rayonun sosial-iqtisadi inkişafının yekunları və 2020-ci ildə qarşıda duran vəzifələr müzakirə edilib.
 
AZXEBER.COM xəbər verir ki, Abşeron RİH başçısı geniş məruzə ilə çıxış edərək bildirib ki, 13 yanvar 2020-ci il tarixdə Azərbaycan Respublikasının Prezidenti cənab İlham Əliyevin yanında 2019-cu ilin yekunlarına həsr olunmuş müşavirə keçirilib. Müşavirədə dövlət başçısı 2019-cu ilin ölkəmiz üçün uğurlu il olduğunu, ilin əvvəlində qarşıya qoyulan bütün vəzifələr icra edildiyini və dayanıqlı inkişafın təmin olunduğunu qeyd edib.

2019-cu il Abşeron rayonu üçün də uğurlu il olduğunu vuğulayan başçının sözlərinə görə, ötən il rayonun sosial-iqtisadi inkişafı ilə bağlı həyata keçirilmiş məqsədyönlü tədbirlər nəticəsində abadlıq-quruculuq işləri davam etdirilib, rayon ərazisində su-kanalizasiya sistemlərinin yenidən qurulması, avtomobil yollarının əsaslı təmiri, elektrik enerjisi, təbii qaz ilə təchizat və digər sosial problemlərin həlli istiqamətində mühüm layihələr icra olunub. "Xüsusilə cənab Prezident İlham Əliyevin müvafiq sərəncamları ilə rayonun Xırdalan, Mehdiabad, Qobu, Saray, Masazır və Ceyranbatan yaşayış məntəqələrində 28 küçə üzrə 39.7 km uzunluğunda yolun əsaslı təmir olunması məqsədilə Azərbaycan Avtomobil Yolları Dövlət Agentliyinə 26.6 milyon manat vəsait ayrılması hər bir abşeronlunun böyük sevincinə səbəb olmuşdur. Bu diqqət və qayğıya görə rayon ictimaiyyəti adından cənab Prezidentə dərin təşəkkürümüzü bildiririk” – deyən İ.Gülməmmədova əlavə edib ki, rayonun daxili imkanları hesabına Xırdalan şəhərində Mehdi Hüseynzadə, Qəşəm Aslanov, Nəsimi küçələri yenidən qurulub, şəhər ərazisində 22-ci və 26-cı məhəllələrin ərazisində nümunəvi məhəllə yaradılması işləri davam etdirilib.

Xırdalan şəhərində 3 yeni istirahət parkının salındığını söyləyən başçı qeyd edib ki, Sumqayıt-Bakı yolunun üzərində Xırdalan şəhərinin girişini bildirən və şəhərin adı yazılmış metal konstruksiya quraşdırılıb. Bundan əlavə Heydər Əliyev Prospektində hasara 560 kv.metr suvaq vurularaq rənglənmiş, 98 kv.m aqlay daşla üzlənib. Rayonun Məmmədli kəndinin mərkəzi Heydər Əliyev, Hökməli-Qobu yolunda Koroğlu küçəsi boyunca yol kənarlarının abadlaşdırılması işləri həyata keçirilib. 2019-cu il ərzində rayonun daxili imkanları hesabına yol infrastrukturunun bərpası və inkişaf etdirilməsi məqsədilə daxili yollara 46886 kub metr çınqıl tökülərək yayılıb, 12590 p/m səki daşı düzülüb. Mehdiabad qəsəbəsində Azadlıq küçəsində 850 kv.metr, Novxanı kəndində M.Sənani, Bakı və M.Ə.Rəsulzadə küçələrinə ümumilikdə 8400 kv.metr, Ceyranbatan qəsəbəsində qəbiristanlığa gedən yola 3000 kv.metr, Masazır kəndində Binəqədi rayonu ilə həmsərhəd hissədə 6000 kv.metr sahəyə asfalt örtük verilib.

Bildirilib ki, hesabat dövründə Xırdalan şəhərində və Ceyranbatan qəsəbəsində 7 çoxmənzilli yaşayış binasının dam örtüyü yenilənib. Eyni zamanda Azərbaycan Respublikası Prezidentinin 2019-cu il 5 fevral tarixli Sərəncamına əsasən ayrılan vəsait hesabına Xırdalan şəhərində 6 çoxmənzilli yaşayış binasında 27 istismara yararsız lift əsaslı təmir olunub.

Ölkə Prezidentinin 2019-cu ilin "Nəsimi ili ” elan etməsi ilə əlaqədar Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə ölkəmizdə keçirilmiş agacəkmə kompaniyasına ürəkdən qoşulan abşeronlular tərəfindən 6 dekabr 2019-cu il tarixdə rayonun yaşayış məntəqələrində 22 min ədəd ağac əkilib. Ümumilikdə 2019-cu ildə Abşeron rayon ərazisində 32 min ədəd ağac əkilib.

Əhalinin sabit elektrik enerjisi ilə təminatı ilə bağlı ötən il çox böyük layihələr həyata keçirilib. Bakı və Abşeron yarımadasının elektrik təchizatında müstəsna rol oynayan 1953-cü ildə tikilən və istismar müddətini başa vuran 220 kilovoltluq "Xırdalan” yarımstansiyasının "Azərenerji” Açıq Səhmdar Cəmiyyəti tərəfindən yenidən qurulmasında son tamamlama işləri görülür. 2019-cu il ərzində Xırdalan şəhərində Azərenerji” Açıq Səhmdar Cəmiyyəti tərəfindən yeni 110 kV-luq "Xırdalan” yarımstansiyasının inşası başa çatdırılaraq şəbəkəyə qoşulub. "Azərişıq” Açıq Səhmdar Cəmiyyəti tərəfindən isə iki 35 kv-luq yarımstansiya istismara verilib. Ümumilikdə isə son 3 il ərzində Xırdalan, Qobu, Masazır, Saray, Fatmayı, Novxanı, Məmmədli yaşayış məntəqələri ərazisində 110 və 35 kilovoltluq 9 yeni yarımstansiya inşa olunaraq istismara verilib.

2019-cu ili ərzində Abşeron Sukanal və Bağlar Sukanal idarələri tərəfindən rayonun yaşayış məntəqələrində müxtəlif diametrli borularla 9645 p/m uzunluqda yeni içməli su, Xırdalan, Masazır və digər ərazilərdə ümumilikdə 1889 p/m uzunluqda kanalizasiya xətləri çəkilib, 48 ədəd müxtəlif markalı su nasosu təmir edilib, 27 çoxmənzilli yaşayış binasının zirzəmisində 967 paqometr kanalizasiya xətti yenisi ilə əvəz olunub. Rayonun daxili imkanları hesabına Ceyranbatan qəsəbəsində Seymur Quliyev küçəsi 1 və 2 saylı, Gündüz Abdullayev küçəsi 11 və 15 saylı binaları üçün yeni kanalizasiya xətləri çəkilərək zirzəmilərdə olan problemlər aradan qaldırılıb.

Azərbaycan Hökuməti ilə Səudiyyə İnkişaf Fondunun birgə maliyyələşdirdiyi Xırdalan şəhərinin su-kanalizasiya sisteminin yenidən qurulması və genişləndirilməsi layihəsi üzrə 2017-ci ilin iyul ayından başlanılan işlər davam etdirilib, ümumilikdə 167 km uzunluğunda içməli su, 88.8 km uzunluğunda kanalizasiya xətti çəkilib, 17583 ev birləşməsi verilərək 11874 sayğac quraşdırılıb.

Rayon əhalisinin təbii qazla təchizatı ilə bağlı Müşviqabad Qaz Paylayıcı Stansiyadan Xırdalan şəhərinə gələn istismar üçün təhlükəli 530 mm diametrli orta təzyiqli qaz xəttinin 2000 metr uzunluğunda hissəsi 400 mm polietilen boru ilə yenisi ilə əvəz olunub. Hökməli qəsəbəsi ərazisində layihə smeta sənədləri əsasında 7000 metr xətt çəkilərək istismara verilib və vətəndaşlar tərəfindən pərakəndə çəkilmiş müxtəlif diametrli qaz xətləri ləğv edilib. Bundan əlavə Xırdalan, Novxanı, Pirəkəşkül, Fatmayı, Qobu, və Güzdək yaşayış məntəqələri ərazisində müxtəlif diametrli 6803 p/m yeni qaz xətləri çəkilib və 9 ədəd qaz təzyiq tənzimləyicisi quraşdırılaraq istismara verilib.

Vətəndaşların telefonla təmin edilməsi məqsədilə rayonun yaşayış məntəqələrində 1410 abunəçi üçün yeni telefon xətt şəbəkəsi tikilib istifadəyə verilib.

Ölkə Prezidentinin sahibkarlığın inkişafı ilə bağlı rayon İcra Hakimiyyətləri qarşısında qoyduğu vəzifələrlə bağlı Abşeron rayonu çox böyük nəticələr əldə edib. Respublika iqtisadiyyatına qoyulan özəl investisiyaların həcminə görə Abşeron rayonu 2018-ci ildə Respublikada birinci yerdə olub və 2019-cu ildə də bu uğurlar

davam etdirilib. Ötən il özəl sahəyə 242 milyon manat investisiya cəlb edilib, Sahibkarlığın İnkişafı Fondu tərəfindən rayon ərazisində fəaliyyət göstərən sahibkarlara 40 investisiya layihəsi üçün 42.5 milyon manat güzəştli kredit verilib. Həyata keçirilən bu layihələr üzrə 975 yeni iş yeri yaradılıb. Ümumilikdə isə 2019-cu il ərzində rayon ərazisində 7168 yeni iş yeri yaradılıb. Sahibkarlığın inkişafına yaradılmış əlverişli şəraitin nəticəsində 2019-cu ildə bir çox iri sənaye və kənd təsərrüfatı məhsulları istehsalı müəssisələrinin inşası həyata keçirilib.

Abşeron rayonunda xalça istehsalı emalatxanasının tikintisi, təchizatı və infrastrukturunun yaradılması məqsədilə Azərbaycan Respublikası Prezidentinin Sərəncamı ilə "Azərxalça” Açıq Səhmdar Cəmiyyətinə ayrılmış 2 milyon manat vəsait hesabına tikinti işləri yüksək səviyyədə başa çatdırılaraq, müəssisə 2019-cu ilin yanvar ayından fəaliyyətə başlayıb. Artıq müəssisədə rayonun Qobu, Hökməli və Güzdək qəsəbələrindən 85 nəfər sakin işlə təmin olunub. Müəssisədə ümumilikdə 160 nəfərin işlə təmin olunması nəzərdə tutulur.

Çox sevindirici haldır ki, ötən il rayonda sənaye məhsulunun həcmi 43.7 faiz artaraq 323 milyon manata çatıb. Sənaye müəssisələrində işləyənlərin sayı 9661 nəfər olub, çalışan işçilərin orta aylıq əmək haqqı 458 manat təşkil edib.

Rayonda kənd təsərrüfatı sahəsində, xüsusilə bitkiçilik məhsulları istehsalının artımına da nail olunub. Rayonunun kənd təsərrüfatı torpaqlarında zeytun və badam bağları sahələrinin genişləndirilməsi və aqropark yaradılması istiqamətində də çox böyük layihə həyata keçirilir. 2018-ci ildə 161 hektar sahədə badam, 2019-cu ilin yazında isə 287 ha sahədə zeytun və 96 sahədə badam bağı salınıb, ümumi meyvə sahəsi 1312 hektara çatdırılıb. Əkilmiş badam sahəsindən ötən il 30 ton məhsul yığılıb.

Sahibkarlığın inkişafı rayonda yerli vergi daxilolmalarının artımına da səbəb olub. 2020-ci ildə daxil olmaqla artıq 9 ildir ki, Abşeron rayonu dotasiya almadan yerli gəlirlər hesabına öz xərclərini maliyyələşdirir və bu il öz xərclərindən əlavə 34 milyon 781 min manat vəsaitin dövlət büdcəsinə ödənilməsi nəzərdə tutulub. Ötən il büdcəyə 18 milyon 236 min manat vəsait cəlb olunaraq proqnoza 114 faiz əməl edilib, rayonun yerli xərcləri isə 97.4 faiz icra olunub.

Ölkə Prezidenti cənab İlham Əliyevin tapşırığına əsasən əhalinin məşğulluğunun artırılması məqsədilə ödənişli ictimai işlərlə bağlı Abşeron rayonu üzrə 770 yeni iş yeri yaradılıb. Bu sahədə şəffaflığın təmin edilməsi istiqamətində rayon ərazisində ödənişli ictimai işlərin düzgün təşkilinə nəzarətin gücləndirilməsi, cəlb edilmiş işçilərin adlarına açılmış əmək haqlarının ödənişi kartlarından kənar adamların istifadəsi hallarına yol verilməməsi məqsədilə müvafiq sərəncam imzalanmışdır. Ödənişli ictimai işlərə cəlb edilmiş işçilərlə rayon İcra Hakimiyyətində görüş keçirərək, bu sahədə tapşırıq və tövsiyələr verilmişdir.

Əvvəlki illərdə olduğu kimi rayon ərazisində məskunlaşmış 11172 məcburi köçkün ailəsinin qayğıları da daim diqqət mərkəzində saxlanılır. Həmişə olduğu kimi məcburi köçkün rayonlarının işğal günü ərəfələrində həmin rayondan olan şəhid ailələri ilə görüşlər keçirilərək onlara maddi köməkliklər olunub.

2019-cu il ərzində rayonun təhsil, səhiyyə və mədəniyyət müəssisələrinin normal fəaliyyətlərinin təmin edilməsi istiqamətində işlər davam etdirilib. Dövlət Proqramına uyğun olaraq, Xırdalan şəhərində 3 saylı tam orta məktəb üçün yeni tədris korpusunun inşasına başlanılıb. Rayon ərazisində fəaliyyət göstərən

ümumtəhsil məktəblərində şagird sıxlığı ilə əlaqədar yeni məktəb binalarının tikintisinə zəruri ehtiyac yarandığından Cənab Prezident tərəfindən məsələnin ciddiliyi nəzərə alınaraq, aidiyyəti orqanlara göstəriş verilib və 2020-ci ildə Abşeron rayonu ərazisində 9 yeni məktəb binasının inşası plana daxil edilib. Hazırda məktəblərin tikiləcəyi ərazi ilə bağlı sənədləşmə işləri aparılır.

Ötən il Görədil kəndində 4 qruplu 80 yerlik körpələr evi-uşaq bağçasının tikintisi başa çatdırılıb, Novxanı kənd 7 saylı uşaq bağçasına istilik sistemi quraşdırılıb, Xırdalan şəhər 15 saylı körpələr evi-uşaq bağçasında isə təmir işləri aparılıb.

Azərbaycan Respublikasının Prezidentinin tapşırığına uyğun olaraq həyata keçirilən, gənc və yeniyetmələrin vətənpərvərlik tərbiyəsinin daha da yüksəldilməsində, dünyagörüşünün formalaşmasında mühüm rol oynayan "Ölkəmizi tanıyaq” layihəsi çərçivəsində rayonun ümumtəhsil məktəblərinin 80 nəfər şagirdi 2019-cu ilin mart ayında Lənkəran-Masallı-Astara rayonlarına, noyabr ayında isə Qəbələ-Şəki-Zaqatala rayonlarına səfər ediblər.

Əhalinin səhiyyə xidmətinin yaxşılaşdırılması istiqamətində də müəyyən tədbirlər həyata keçirilib. Azərbaycan Respublikası Prezidentinin müvafiq Sərəncamı ilə Səhiyyə Nazirliyinə ayrılan vəsait hesabına Xırdalan şəhəri ərazisində Rayon Mərkəzi Xəstəxanası üçün bina tikintisində işlər davam etdirilir. Azərbaycan Respublikasının Prezidenti cənab İlham Əliyevin tapşırığına uyğun olaraq, 2019-cu ilin fevral-may aylarında rayonda 107750 nəfər sakin tibbi müayinədən keçirilib.

Hesabat dövründə rayonda kriminogen vəziyyət sabit olub, cinayətkarlığa qarşı mübarizə, ictimai təhlükəsizliyin təmini sahəsində əvvəlki illərin müsbət nəticələri hesabat dövründə də qorunub saxlanılıb. Ötən il Azərbaycan Respublikası Daxili İşlər Nazirliyinin sifarişi ilə rayonun Qobu qəsəbəsi ərazisində Abşeron rayon Polis İdarəsinin yeni Polis Bölməsi üçün bina tikintisi başa çatdırılaraq istifadəyə verilib və bölmə 31 nəfər şəxsi heyətlə fəaliyyətə başlayıb.

Əvvəlki dövrlərdə olduğu kimi hesabat dövründə də vətəndaşların qəbuluna diqqətlə yanaşılıb, rayon İcra Hakimiyyətində və hər həftə rayonun qəsəbə və kəndlərində səyyar qəbul keçirməklə vətəndaşların mütəmadi qəbulları təşkil edilib. Ötən il 858 nəfər vətəndaşın müraciəti dinlənilib, onların qaldırdığı problemlərin həll olunması üçün lazımi tədbirlər görülüb. Xüsusilə 2019-cu ildə rayonun qəsəbə və kəndlərində 7 min nəfərdən çox sakinin iştirak etdiyi 42 səyyar qəbul-görüş keçirilib. Qəbullarda qaldırılan məsələlərlə bağlı tədbirlər planı tərtib edilərək aidiyyəti müəssisə və təşkilatlarla birlikdə həlli ciddi nəzarətə götürülüb.

2019-cu ildə ölkəmizin həyatında mühüm kompaniyalar olan oktyabr ayının 1-dən 10-dək əhalinin siyahıyaalınması, 2019-cu ilin 23 dekabrında bələdiyyə, 2020-ci ilin fevralın 9-da isə Azərbaycan Respublikasının Milli Məclisinə seçkilər keçirilib. Bu mühüm kompaniyaların da həmişə olduğu kimi rayonda yüksək səviyyədə keçirilməsi təmin edilib. Siyahıyaalma ilə əlaqədar rayonun 16 yaşayış məntəqəsində 509866 nəfər əhalinin yaşadığı müəyyən edilib, bununla əlaqədar yaradılan 36 siyahıyaalma məntəqəsi üzrə məlumat formaları tərtib edilərək Azərbaycan Respublikasının Dövlət Statistika Komitəsinə təqdim edilib.

Qeyd edilib ki, "Bəzi çoxmənzilli yaşayış binalarının istismarına icazə verilməsinin sadələşdirilməsi haqqında ” ölkə Prezidenti tərəfindən ötən ilin

fevral ayında imzalanan fərmana uyğun olaraq Abşeron rayonu ərazisində 42-dək MTK tərəfindən inşa edilən 100-dən çox yaşayış binasının sənədləşdirilməsi nəzərdə tutulub. Bunlardan artıq 19 MTK tərəfindən inşa olunan 70-ə yaxın binanın istismarına icazə verilib.

Ölkə Prezidenti cənab İlham Əliyevin 30 dekabr 2019-cu il tarixli Sərəncamı ilə 2020-ci il Azərbaycan Respublikasında "Könüllülər ili” elan edilib. Könüllülərlə iş Rayon İcra hakimiyyətinin daim diqqət mərkəzində saxlanılır. 2019-cu ildə könüllülərlə bağlı Abşeron rayonunda çox böyük işlər görülüb. Müxtəlif sosial bacarıqlar və əmək vərdişləri aşılayan təlimlər, könüllülərin iştirakı ilə iməciliklər, hərbi hissələrdə əsgərlərlə görüş və digər tədbirlər təşkil edilib.

Bildirilib ki, cənab Prezident İlham Əliyevin müvafiq sərəncamı ilə "Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı” təsdiq olunub. Proqramda Abşeron rayonu ərazisində elektrik enerjisi, içməli su, təbii qaz, yol, rabitə və digər infrastruktur layihələrinin icrası, sahibkarlığın inkişafı, investisiyaların cəlb edilməsi, aqroparkın fəaliyyətinin genişləndirilməsi, yeni məktəb və tədris korpuslarının inşası, Mərkəzi Rayon Xəstəxanası üçün bina tikintisinin başa çatdırılması, eyni zamanda ölkə Prezidentinin müvafiq Sərəncamı ilə ayrılmış vəsait hesabına rayonun 6 yaşayış məntəqəsində 39.7 km uzunluğunda 28 küçənin asfaltlanaraq sakinlərin istifadəsinə verilməsi və digər sosial layihələrin həyata keçirilməsi nəzərdə tutulub. Bundan əlavə həlli rayonun imkanları daxilində olmayan sosial-iqtisadi problemlərlə bağlı Prezident Administrasiyası, Nazirlər Kabineti və aidiyyəti Nazirliklər, Səhmdar Cəmiyyətləri qarşısında məsələlər qaldırılıb və bu məsələlərin həlli ilə bağlı ciddi iş aparılır.

Sonra Azərbaycan Respublikası Prezident Administrasiyasının məsul işçisi Habil Əzənmədov, Rayon üzrə Maliyyə idarəsinin rəisi Faiq Şirəliyev, Xırdalan şəhər inzibati ərazi dairəsi üzrə nümayəndəsi Rafiq Yusubov, Xırdalan Enerji Təchizatı və Satışı İdarəsinin rəisi Şahin Qədimli, Rayon Təhsil şöbəsinin müdiri Nazilə Məmmədova, YAP Abşeron rayon təşkilatının Gənclər Birliyinin sədri Elnur Mirzəyev çıxış edərək görülən işlər və qarşıda duran vəzifələr barəsində məlumat veriblər.

Bundan sonra rayonun sosial-iqtisadi, mədəni və ictimai həyatında səmərəli fəaliyyətlərinə və əldə etdikləri nailiyyətlərə görə bir neçə şəxs Rayon İcra Hakimiyyəti başçısının Fəxri Fərmanı ilə təltif olunublar.
 


 

 

 

 

 


OXŞAR XƏBƏRLƏR