Azərbaycan Dövlət Neft və Sənaye Universitetinin üç nümayəndəsi – Rəqəmsal İnkişaf və İnnovasiyalar Mərkəzinin direktoru Elviz İsmayılov, rektorun müşaviri Orxan Kərimzadə və Mexanika kafedrasının müəllimi Məhmud İsmayılov – Oksfordun nüfuzlu "Qlobal İqlim Dəyişikliyi Çağırışı 2025” ("Oxford Saïd Global Climate Change Challenge 2025”) beynəlxalq müsabiqəsinin münsif heyətinə seçilib.
AZXEBER.COM xəbər verir ki, münsif heyətində ümumilikdə 25 nəfər yer alır və onlar 15 müxtəlif ölkəni təmsil edirlər. Ən çox nümayəndəsi olan ölkələr Birləşmiş Krallıq (5 nəfər), Azərbaycan (3 nəfər) və Hindistan (3 nəfər) olub. Azərbaycanı isə yalnız ADNSU-nun nümayəndələri – Elviz İsmayılov, Məhmud İsmayılov və Orxan Kərimzadə təmsil edir.
Saïd Biznes Məktəbi (Oksford Universiteti) tərəfindən təşkil olunan bu qlobal yarışma, dünyanın müxtəlif ölkələrindən məktəblilər (15–18 yaş) və müəllimləri bir araya gətirərək iqlim dəyişikliyi ilə mübarizə üzrə innovativ həllərin hazırlanmasını hədəfləyir və BMT-nin COP30 İqlim Konfransına (Braziliya, noyabr 2025) hazırlıq çərçivəsində keçirilir.
ADNSU müəllimləri dünyanın aparıcı iqlim mütəxəssisləri, biznes liderləri və alimlərindən ibarət beynəlxalq münsif heyətinin tərkibində yer alaraq, iştirakçıların təqdim etdiyi layihələri qiymətləndirəcəklər. Onların təcrübəsi və biliyi, gənclərin hazırladığı ən təsirli və innovativ iqlim həllərinin seçilməsində mühüm rol oynayacaq.
Qeyd edək ki, ilk dəfə 2024-cü ildə keçirilən yarışmaya 58 ölkədən 1,000-dən çox müraciət daxil olmuşdu. 2025-ci ildə qalib gələn beş şagird komandası layihələrini sentyabrda Oksfordda təqdim edəcək, beş müəllim isə dərs planlarını COP30-da təqdim edəcək. Qaliblərə tam maliyyələşdirilən təhsil və proqram imkanları təqdim olunacaq. Yarışmada iştirakçılar hava çirkliliyi, ekstremal hava hadisələri, ərzaq təhlükəsizliyi, su qıtlığı və biomüxtəliflik mövzularında öz həll təkliflərini təqdim edəcəklər.
ADNSU-nun beynəlxalq platformada bu uğurlu təmsilçiliyi, universitetin qlobal iqlim müzakirələrində və innovativ həllərin inkişafında fəal iştirakının göstəricisidir.
