Naharın hansı saatda yeyilməsi yalnız gündəlik qidalanma rejiminə deyil, çəkiyə nəzarətə də təsir göstərə bilər.
Aparılan araşdırmalardan birində arıqlamağa çalışan 420 nəfərin qidalanma vərdişləri izlənilib.
Məlum olub ki, naharını saat 15:00-dan əvvəl edən iştirakçılar daha gec nahar edənlərlə müqayisədə çəkilərini daha sürətli və davamlı şəkildə azaldıblar.
Mütəxəssislər bunu orqanizmin bioloji saatı ilə əlaqələndirirlər. Sirkad ritmləri maddələr mübadiləsi də daxil olmaqla bir sıra fizioloji proseslərin fəaliyyətinə təsir göstərir.
Başqa bir araşdırmada isə eyni qidalanma rejiminə malik şəxslər müqayisə edilib. Əsas yeməyini təxminən saat 16:30-da yeyənlərdə qanda qlükozanın tənzimlənməsinin saat 15:00 radələrində nahar edənlərlə müqayisədə daha zəif olduğu müşahidə edilib.
Bununla belə, naharı erkən saata keçirmək öz-özlüyündə arıqlamağa zəmanət vermir. Çəkiyə qidaların ümumi kalorisi və tərkibi, fiziki aktivlik, yuxu rejimi və digər amillər də təsir göstərir.
Mütəxəssislər gündəlik qidalanmada zülal, mürəkkəb karbohidratlar, tərəvəz və meyvələrə üstünlük verməyi, şəkər və yüksək dərəcədə emal olunmuş məhsulların qəbulunu isə məhdudlaşdırmağı tövsiyə edirlər.
Beləliklə, imkan olduqda əsas gündüz yeməyini 15:00-dan əvvəl qəbul etmək çəkiyə nəzarət baxımından daha əlverişli seçim ola bilər. Lakin bu, arıqlamaq üçün təkbaşına effektiv üsul kimi qiymətləndirilməməlidir.
/baku.ws
