Avtomobil sexində baş verən yanğın - VİDEO

Yanğın hadisəsi Cəlilabad şəhər M.Hüseyn küçəsində yerləşən Rövşən Mirzəzadəyə məxsus avtomobil təmiri sexində baş verib. Ümumi sahəsi 130 kv.m olan avtomobil təmiri sexinin yanar konstruksiyaları və içərisində təmirə dayanmış 1 ədəd “Mercedes” və 2 ədəd “VAZ” markalı minik avtomobillər tamamilə yanaraq yararsız hala düşüb. Sex sahibinin sözlərinə görə, yanğının elektrik naqillərindəki qısaqapanmadan baş verməsi istisnadır: “Bura ancaq dayanacaq kimi istifadə olunub. Maşınların akkumulyatorları üstündə olmayıb”.Hadisə yerinə cəlb olunmuş Fövqəladə Hallar Nazirliyinin Cəlilabad rayon yanğından mühafizə hissəsinin əməkdaşları yanğının genişlənməsin qarşısını alıblar. Sexdə olan digər 2 “VAZ” markalı avtomobil yanğından mühafizə oluna bilib. Ümumilikdə, vətəndaşa 35 min manatdan çox maddi ziyan dəydiyi bildirilir. Yanğın hadisəsinin qəsdən və ya təsadüfən baş verməsi araşdırmaların sonunda məlum olacaq.