Minifutbol üzrə Azərbaycan milli komandası bu gün tarixi sınaq qarşısındadır. Slovakiyada keçirilən Avropa çempionatında finala yüksələn yığmamız qitənin ən güclüsü olmaq uğrunda Ukrayna millisi ilə üz-üzə gələcək. Baş məşqçi Elşad Quliyevin rəhbərlik etdiyi komanda növbəti uğura imza ataraq Avropa çempionu olmaq niyyətindədir.
Tanınmış idman şərhçisi Kənan Məstəliyev AZXEBER.COM-a açıqlamasında bildirib ki, Azərbaycan millisi artıq minifutbolda hər bir rəqibin hesablaşdığı komandaya çevrilib:
"Minifutbol üzrə Azərbaycan millisindən artıq bütün rəqiblər çəkinirlər. Son illərdə əldə olunan uğurlar yığmamızın gücünü və potensialını tam şəkildə sübut edib. Azərbaycan millisi həm Avropa, həm də dünya çempionu olmaqla minifutbolda söz sahibi olan komandalar sırasına yüksəlib”.
Şərhçi hesab edir ki, yığmamız final görüşündə də favoritdir:
"Komandamız iştirak etdiyi hər bir turnirin əsas favoritlərindən hesab olunur. Ukrayna ilə keçiriləcək final görüşündə də favorit məhz Azərbaycan millisidir. Bununla belə, Ukrayna yığması da güclü komandadır və rəqibə ciddi yanaşmaq lazımdır. İnanıram ki, komandamız bu qarşılaşmada da qələbə qazanaraq növbəti dəfə Avropa çempionu olacaq”.
Futbol şərhçisi Ramiz Mirzəzadə isə bildirib ki, Serbiya üzərində qazanılan qələbədən sonra Azərbaycan yığması turnirin əsas favoritlərindən biri kimi qəbul olunur:
"Minifutbol üzrə Azərbaycan milli komandası son dünya çempionudur və hazırda dünyanın ən güclü komandalarından biri hesab olunur. Son illərdə əldə olunan uğurlar, xüsusilə Avropa çempionatında Serbiya üzərində qazanılan qələbə bunu bir daha təsdiqləyir. Son Avropa çempionuna qarşı əldə edilən nəticədən sonra Azərbaycan yığması turnirin əsas favoritlərindən biri kimi göstərilməyə başlanıb.
Ukrayna millisi də finala qədər inamlı çıxış edib. Lakin Azərbaycan millisinin dünya çempionu statusu, futbolçularımızın oyun üslubu, fiziki hazırlığı və taktiki üstünlükləri komandamızı bu qarşılaşmada favorit kimi önə çıxarır”.
Ramiz Mirzəzadə final görüşündə Azərbaycanın qələbə qazanacağına inandığını da vurğulayıb:
"Dünyanın ən güclü minifutbol komandalarından biri olan Azərbaycanın Bratislavada keçiriləcək final görüşündə qalib gələcəyinə inanıram. Hesab edirəm ki, Azərbaycan hazırda minifutbol sahəsində ən yaxşı infrastruktura, peşəkar idarəetmə sistemlərindən birinə və sürətlə inkişaf edən layihələrə sahib ölkələrdəndir.
Son illərdə qazanılan uğurlar bunu təsdiqləyir. Avropanın güclü komandaları olan Rumıniya və Serbiyanı geridə qoymaq, dünya çempionu olmaq, Avropa çempionatının finalına yüksəlmək və çempionluğa bu qədər yaxın olmaq Azərbaycan minifutbolunun keçdiyi böyük inkişaf yolunun göstəricisidir”.
Şahanə
