Azərbaycan və Qazaxıstan arasında iqtisadi sahədə əlaqələr dinamik inkişaf edir. bu əlaqələrin daha da möhkəmlənməsi və ticarət həcminin artırılması üçün imkanlar böyükdür. İki ölkə arasında yükdaşımaların həcmini artırmaq üçün müvafiq addımlar atılır.
Azərbaycanla Qazaxıstan arasında imzalanan sazişlər iqtisadi sahələrdə əməkdaşlığı daha da dərinləşdirəcək. İki ölkə arasında ticarət dövriyyəsinin 1 milyard dollara çatdırılması hədəflənir.
İqtisadiyyat naziri Mikayıl Cabbarov İctimai TV-yə bu barədə danışıb: "Cənab Prezidentin müvafiq tapşırıqlarına və göstərişlərinə uyğun olaraq Qazaxıstanla həm ənənəvi sahələrdə - energetika, nəqliyyat, həm yeni sahələrdə böyük irəliləyişlər və artıq ilkin nəticələri görürük. Belə ki, 2022-ci ili son nəticələrinə görə ölkələrimiz arasında ticarət dövriyyəsi bizim gömrük statistikasına əsasən 4 dəfədən çox artıb və təxminən 590 milyon manat təşkil edir. Artıq Astanada keçirilən görüşlərdə bu rəqəmin yaxın illərdə 1 milyard dollara çatdırılması hədəfi qoyulub”.
Azərbaycandan Qazaxıstana daha böyük həcmdə kənd təsərrüfatı və digər məhsullar ixrac ediləcək.
Nazir Mikayıl Cabbarov qeyd edib ki, bir neçə il bundan öncə Aktau şəhərində Azərbaycan tərəfindən böyük və müasir yük terminalının tikintisi həyata keçirilibdir. Qazax tərəfi həmin terminaldan daha faydalı istifadə etməkdə marağı olduğunu bildirərək, o cümlədən Azərbaycandan Qazaxıstana daha böyük həcmdə kənd təsərrüfatı və digər ölkəmizdə istehsal olunan məhsulların təchiz edilməsində maraqlı olduğunu gündəmə gətirmişdir.
Qarşıya qoyulan hədəflərdən biri də Orta Dəhlizin imkanlarından daha geniş istifadə etməkdir. Bununla da iki ölkə arasında yükdaşımaların həcmi daha da artacaq. Eləcə də Azərbaycanın Xəzər dənizində ən müasir gəmiqayırma zavoduna malik olması nəzərə alınmaqla Qazaxıstan tərəfindən yeni gəmilərin sifarişilə bağlı da razılaşma əldə edilib.
