Son illər estetik əməliyyatlar və kosmetoloji prosedurlar sosial şəbəkələrdə ən çox müzakirə olunan mövzulardan birinə çevrilib.
Bu mövzu son aylarda aktyor Taleh Yüzbəyovun çəkildiyi reklam çarxından sonra yenidən gündəmə gəlib. Reklamda estetik müdaxilələr və təbii gözəllik mövzusuna toxunulması sosial şəbəkələrdə geniş müzakirələrə səbəb olub. Bir çox qadın çarxı tənqid edərək onun estetik əməliyyat etdirmiş şəxslərə qarşı qərəzli mesaj verdiyini bildirib.
Gündəmdə əsasən xarici görünüşündə estetik dəyişikliklər etdirən qadınlar yer alsa da, bu sahəyə maraq göstərən kişilərin sayı da getdikcə artır.
Bir qisim estetik müdaxilələri özünəqulluq və şəxsi seçim kimi qiymətləndirir, digərləri isə onların süni görünüş yaratdığını düşünərək tənqid edir. Müzakirələr daha çox qadınlar üzərində cəmləşdiyindən, kişilərin etdirdiyi estetik əməliyyatlar və kosmetoloji prosedurlar isə əksər hallarda diqqətdən kənarda qalır.
Halbuki bu gün kişilər də həm estetik əməliyyatlara, həm də qeyri-cərrahi kosmetoloji prosedurlara geniş şəkildə müraciət edirlər.
AZXEBER.COM kişilər arasında ən çox üstünlük verilən estetik əməliyyatları və kosmetoloji prosedurları araşdırıb.
Ən çox seçilən estetik əməliyyatlar
Rinoplastika və septorinoplastika – Burunun formasını, ölçüsünü və quruluşunu dəyişdirmək, estetik görünüşü yaxşılaşdırmaq, eyni zamanda tənəffüs problemlərini aradan qaldırmaq məqsədilə icra edilir. Septorinoplastika zamanı burun estetikası ilə yanaşı, əyri burun çəpəri (septum) də korreksiya olunur.
Ginekomastiya əməliyyatı – Kişilərdə süd vəzilərinin həddindən artıq böyüməsinin cərrahi yolla aradan qaldırılmasıdır.
Mentoplastika – Çənənin formasının böyüdülməsi, kiçildilməsi və ya korreksiya olunması ilə üz cizgilərinin daha proporsional görünməsi məqsədilə həyata keçirilir.
Çənə implantı – Çənə xəttini daha ifadəli göstərmək üçün silikon və ya digər implantların yerləşdirilməsi əməliyyatıdır.
Çənəaltı liposaksiya – İkiqat çənənin ("double chin") aradan qaldırılması məqsədilə çənəaltı nahiyədəki artıq piy toxumasının çıxarılmasıdır.
Üz implantları – Yanaq və ya çənə nahiyəsinə implant yerləşdirilərək üz konturlarının daha ifadəli görünməsi təmin edilir.
Blefaroplastika – Göz qapaqlarındakı artıq dəri və piy toxumasının çıxarılması ilə daha gənc və dinamik görünüş əldə edilir.
Otoplastika – İrəli çıxan və ya forması pozulmuş qulaqların cərrahi yolla korreksiya edilməsidir.
Facelift (üz gərmə əməliyyatı) – Üzdə sallanmış dəri və yumşaq toxumaların gərilməsi nəticəsində qırışların azaldılması və daha gənc görünüşün əldə olunması məqsədilə icra edilir.
Boyun gərmə (Neck Lift) – Boyun nahiyəsində sallanmış dərinin və artıq piy toxumasının aradan qaldırılması əməliyyatıdır.
Saç transplantasiyası – Donor nahiyədən götürülən saç köklərinin seyrək və ya keçəlləşmiş sahələrə köçürülməsidir.
Saqqal transplantasiyası – Saqqalın seyrək olduğu və ya ümumiyyətlə çıxmadığı nahiyələrə saç köklərinin köçürülməsi əməliyyatıdır.
Qeyri-cərrahi kosmetoloji prosedurlar
Botoks – Alın, qaşarası və göz ətrafındakı mimik qırışların görünüşünü azaltmaq məqsədilə botulinum toksinin tətbiqidir.
Dermal dolğu (Filler) – Çənə, yanaq, çənə xətti, gözaltı və digər nahiyələrin həcmini artırmaq, həmçinin üz konturlarını daha aydın göstərmək üçün hialuron turşusu əsaslı dolğuların tətbiqidir.
Jawline dolğusu – Çənə xəttini daha ifadəli və kəskin göstərmək məqsədilə tətbiq olunan dolğu prosedurudur.
PRP (Platelet Rich Plasma) – Pasiyentin öz qanından əldə edilən plazmanın dəriyə və ya saç dərisinə yeridilməsi ilə kollagen sintezi və saç inkişafı stimullaşdırılır.
Mikroiynələmə (Microneedling) – Dəridə mikrokanallar yaradılaraq kollagen sintezi stimullaşdırılır və dərinin yenilənməsi dəstəklənir.
HIFU (High-Intensity Focused Ultrasound) – Əməliyyatsız üz və boyun gərilməsi məqsədilə yüksək intensivlikli fokuslanmış ultrasəs dalğalarından istifadə olunur.
RF lifting (Radiofrekans) – Dərinin sıxlığını və elastikliyini artırmaq üçün radiofrekans enerjisinin tətbiq olunduğu prosedurdur.
Lazer epilyasiyası – Üz, boyun, sinə, kürək və digər nahiyələrdə arzuolunmayan tüklərin uzunmüddətli azaldılması məqsədilə həyata keçirilir.
Diş estetikası (Smile Design) – Dişlərin ağardılması, laminat və ya vinirlərin tətbiqi ilə gülüş estetikasının yaxşılaşdırılması prosedurudur.
Fəridə Əsədzadə
