Azərbaycanda 'Musiqili Olimp' festivalı keçiriləcək
MƏDƏNİYYƏT
20:11 26.07.2012
1705
Heydər Əliyev Fondu, Mədəniyyət və Turizm Nazirliyinin təşkilatçılığı ilə Azərbaycanda ilk dəfə olaraq “Musiqili Olimp” festivalı keçiriləcək. AZXEBER.COM-un məlumatına görə, Üzeyir Hacıbəyli adına 3-cü Beynəlxalq Musiqi Festivalı tərkibində təşkil edilən bu beynəlxalq klassik musiqi konserti 18-21 sentyabrda Bakı Dövlət Filarmoniyasında və sentyabrın 20-də isə Beynəlxalq Muğam Mərkəzində keçiriləcək.“Musiqili Olimp” festivalı ilə Ü.Hacıbəyli Beynəlxalq Musiqi Festivalının birgə təşkili ideyası məşhur dirijor Eyyub Quliyevin (2010-cu ildə İtaliyanın Parma şəhərində keçirilən A.Toskanini adına Beynəlxalq Dirijorlar Müsabiqəsinin qalibi, I dərəcəli C.Sinopoli mükafatı laureatı) təşəbbüsü əsasında irəli sürülüb. Azərbaycanda baş tutacaq “Musiqili Olimp” festivalında bir sıra tanınmış sənətkarlar iştirak edəcəklər: Solen Paydassi (Fransa), M.Lonq və J.Tibo adına Beynəlxalq Dirijorlar müsabiqəsinin I dərəcəli mükafatı laureatı, 2010; Signum saksofonçular kvarteti (Almaniya), Beynəlxalq Musiqi Müsabiqəsinin (TİM) I dərəcəli mükafatı laureatı, Verona, (İtaliya), 2010; Аşu (ABŞ), The International Salon de Virtuosi Career (Nyu York, ABŞ) müsabiqəsinin qalibi (2008), Kristof Kruaze (İsveçrə), IBLA Grand Prize Beynəlxalq Müsabiqəsinin Qran-Pri sahibi, Roquza, Siciliya (İtaliya) 2010; İlya Maksimov (Rusiya), M.Kanals adına Beynəlxalq Pianoçular müsabiqəsinin II dərəcəli mükafatı laureatı, Barselona (İspaniya), 2008. Konsertdə həmçinin Eyyub Quliyevin dirijorluğu ilə Azərbaycan Dövlət Simfonik Orkestri də çıxış edəcək. Festivalın solistlərinin proqramına S.Prokofyev, A.Dvorjakov, S.Barbera, B.Bartoka, J.İbera, A.Pyatsola, P.Çaykovskiy, S.Raxmaninovun əsərləri daxil edilib. “Musiqili Olimp” Fondunun Prezidenti İrina Nikitinanın sözlərinə görə, bu festival əslində klassik musiqinin gələcəyinin özünəməxsus anonsudur. “Bu il ilk dəfə olaraq festival konsert proqramı ilə Azərbaycana gəlir və bu, festivalın nüfuzunun beynəlxalq səviyyədə artmasına işarə edir. Ümid edirik ki, bu festival Nyu-Yorkun Karnegi-hol zalında, Sürixdə, Berlin Filarmoniyasında, Sinqapurun Esplanad konsert zalında keçirilən tədbirlər kimi bizim solistlərin də iştirak etdiyi ənənəvi beynəlxalq musiqi tədbirinə çevriləcək”. 1995-ci ildə Rusiyada yaradılan və hər il keçirilən “Musiqi Olimp”i festivalında adətən klassik musiqi elitasının gənc nümayəndələri iştirak edir. Dünya klassik musiqi tənqidçilərinin yüksək rəyini almış bu festival neçə ildir ki, beynəlxalq layihə kimi tanınır və musiqi sahəsində qloballaşmanın parlaq nümunəsinə çevrilib. Festivalın əsas məqsədi milli mənsubiyyətindən asılı olmayaraq peşəkar və istedadlı gənc musiqiçilərin yaradıcılıq karyeralarına dəstək olmaqdır. Bu festivalda ancaq nüfuzlu beynəlxalq müsabiqələrin qalibləri iştirak edirlər. Festivalın 17 illik tarixi müddətində 40 ölkədən 400-dən artıq gənc ifaçılar iştirak ediblər.
