Azərbaycanı bir-birinə qatan müəllimə universitetə getmir

Sabiq deputat, Bakı Dövlət Universitetinin müəllimi Gülər Əhmədova işə çıxmır.  BDU-nun sosial elmlər və psixologiya fakültəsinin dekanı Hikmət Əlizadə dekabrın 28-də “Media forum” saytına açıqlamasında deyib ki, Gülər Əhmədova 15 gün olar bülletenə çıxıb: “Səhhətində problemlər var. İşə haçan çıxacağı barədə məlumatım yoxdur”. Gülər Əhmədova psixologiya elmləri namizədidir. 2000, 2005 və 2010-cu illərdə parlamentin deputatı seçilib. Bu ilin payızınadək parlamentdə 34 saylı Xətai ikinci seçki dairəsini təmsil edirdi. Sentyabrın 25-də hakim Yeni Azərbaycan Partiyasından deputat Gülər Əhmədovanın Fransada yaşayan sabiq universitet rektoru Elşad Abdullayevdən rüşvət istəməsini əks etdirən video yayılıb. Videoda deputatla sabiq rektor və vasitəçi kimi təqdim olunan, Sabir adına kitabxana-klubun direktoru Sevinc Babayeva arasında Elşad Abdullayevin Milli Məclisin üzvü seçilməsi üçün yüksək məbləğdə rüşvət verməsi, ondan əlavə məbləğ istənilməsi barədə dialoq əksini tapıb. Bakı Şəhər Prokurorluğu bu video işinə görə Cinayət Məcəlləsinin 178.3.2-ci maddəsi ilə (külli miqdarda ziyan vurmaqla dələduzluq) iş qaldırıb. Gülər Əhmədova sentyabrın 28-də Milli Məclis sədrinin adına ərizə yazaraq mandatından imtina edib. Oktyabrın 3-də Mərkəzi Seçki Komissiyası Gülər Əhmədovanın deputatlığına xitam verib.  Elşad Abdullayev dekabrın 13-də daha bir video yayıb. Videoda Elşad Abdullayevin Sevinc Babayeva ilə söhbəti yer alır. Qadın hakim Yeni Azərbaycan Partiyasından deputat Gülər Əhmədovanın adından Elşad Abdullayevi əmin etməyə çalışır ki, verdiyi rüşvətin əvəzində deputat mandatı alacaq və bu, tezliklə elan ediləcək, seçkinin nəticələrinə dair bütün protokollar da artıq Elşad Abdullayevin xeyrinə dəyişdirilib (Söhbət 2005-ci ildə keçirilən parlament seçkisindən gedir. Elşad Abdullayev həmin seçkidə 8 saylı Binəqədi seçki dairəsindən deputatlığa namizəd olub). Bu videonun ardınca Gülər Əhmədova hakim Yeni Azərbaycan Partiyasından çıxarılıb. 178.3.2-ci maddəsi ilə istintaq olunan cinayət işi üzrə axtarışda olan Sevinc Babayeva dekabrın 26-da Türkiyədə vəfat edib.