Fazil Mustafa: “Bəyənənlər də, bəyənməyənlər də mövqelərini bildirdi”.
Xəbər verdiyimiz kimi, son günlər mətbuatın gündəmində deputat Fazil Mustafanın “Bu Şəhərdə”nin aktyorları Rafael və Coşqunun “Azercell”in ən son reklamında qadın paltarı ilə çəkilməsini sərt tənqid etməsi olub. Məsələ ilə bağlı hər iki tərəf mətbuatda öz fikirlərini bölüşüb. Son olaraq, Fazil Mustafa öz rəsmi “facebook” səhifəsində son hadisələrlə bağlı mövcud polemikaya son verdiyini açıqlayıb. Deputat bu məsələdə “Azercell”in də açıqlama verməyə borclu olduğunu söyləyib:
“Dəyərli dostlar! Bu gün Bakı şəhər İcra Hakimiyyəti başçısına məktubu göndərdim. Ona görə də cavab gələnə qədər istərdim ki, bu mövzuda müzakirələri dayandıraq. Mövqeyimizə dəstək verən və ya verməyən hər kəsə təşəkkür edirəm. Əslində bu elə məsələdir ki, burada qərəzli mövqe sərgiləmək, el sözü ilə desək "nala-mıxa" vurmaq mümkün deyil. Heç kimsənin sənətinə qarışmadan sadə bir sualı cavablandırmar lazım idi: kişinin qadın paltarı ilə reklamının şəhərimizi bəzəməsini yumşaq desək, bəyənirsən, ya bəyənmirsən. Bəyənənlər də, bəyənməyənlər də mövqelərini bildirdi.
Burada məyusedici bir xüsusiyyəti də qeyd etməkdə fayda var. Kaş ki, hörmətli aktyorlar və ya onların sözçüləri hazırcavablıqla haqlıcavablılığı qarışdırmayaydılar və ifadələrini dəqiq cilalayandan sonra açıqlama verəydilər. Yoxsa "Oqtay müəllimə ərizə yazaq ki, onu işdən çıxarsın?" (???) Yaxud "O, yalnız Sabunçu sakinləri adından danışa bilər, millətin adından danışa bilməz" (???) kimi sadə bir məntiq testindən keçə bilməyəcək üslubda cavab verməzdilər. Bu o deməkdir ki, mən bu gün seçicilər qəbul edərkən ayrı-ayrı rayonların sakinlərinin problemlərini dinləmədən geri qaytarmalıydım, hər gün müxtəlif bölgələrdən olan insanlarından aldığım ərizələrə "Öz deputatınıza yazın!" dərkənarı qoymalıydım.
Məsələ ilə bağlı "Azersell" rəsmilərinin öz mövqeyini açıqlamasını gözləyirəm. Çünki sifarişçi olaraq onlar da ciddi nöqsana yol veriblər.
İnşallah xarici səfərdə olacağıma görə, bəzi məsələlərə dərhal münasibət bildirmənin imkansız olduğunu anlayışla qarşılayacağınıza ümid edirəm.”
