Xəbər verdiyimiz kimi, Baş Prokurorluqda Azərbaycan Respublikasının konstitusiya quruluşunun zorla dəyişdirilməsi, ərazi bütövlüyünün parçalanması, milli nifrət və düşmənçiliyin salınması, həmçinin terrorçuluğa açıq çağırışlarla bağlı cinayət işi üzrə istintaq aparılıb. İstintaq zamanı Rusiya vətəndaşları – "Moskva 24” telekanalının aparıcısı İvan Knyazev, siyasi məsləhətçi və media eksperti Semyon Uralov, televiziya jurnalisti Aleksey Çadayev barəsində əsaslı şübhələr müəyyən edilib.
Bildirilib ki, onlar iyulun 14-də və avqustun 13-də "YouTube” platformasında yayımlanan verilişlərdə Azərbaycan Respublikasına qarşı zorakı üsullardan istifadə, ölkənin konstitusiya quruluşunun zorla dəyişdirilməsi, ərazi bütövlüyünün parçalanması və milli nifrətin yaradılması ilə bağlı çağırışlar səsləndiriblər. Bununla bağlı Azərbaycan Respublikası Baş prokurorunun qərarı ilə Cinayət Məcəlləsinin 214-2, 281.2 və 283.2.1-ci maddələri üzrə cinayət işi başlanıb. Toplanmış sübutlar əsasında Semyon Uralov, İvan Knyazev və Aleksey Çadayev təqsirləndirilən şəxs qismində cəlb ediliblər. Onlar Azərbaycan ərazisindən kənarda olduqları üçün barələrində axtarış elan edilib və məhkəmə qərarı ilə həbs qətimkan tədbiri seçilib. Həmçinin həmin şəxslərin müəyyən edilərək tutulması və Azərbaycana təhvil verilməsi üçün aidiyyəti dövlət qurumlarına müraciətlər göndərilib.
Milli Məclisin deputatı Azər Badamov AZXEBER.COM-a açıqlamasında deyib ki, müxtəlif media platformalarında və televiziya proqramlarında yayımlanan bu cür materiallar Azərbaycan-Rusiya münasibətlərinə xələl gətirən təhlükəli təbliğat nümunələridir:
"Son günlər Rusiya informasiya məkanında Azərbaycan xalqına, dövlətinə və Azərbaycan Respublikasının rəhbərliyinə qarşı təhqir, hədə və fiziki zorakılığa çağırış xarakterli ifadələrin səsləndirilməsi geniş vüsət alıb. Müxtəlif media platformalarında və televiziya proqramlarında yayımlanan bu cür materiallar yalnız jurnalist etikasının və peşə prinsiplərinin pozulması deyil, eyni zamanda Azərbaycan-Rusiya münasibətlərinə xələl gətirən, cəmiyyətlər arasında qarşılıqlı etimadı və dostluq münasibətlərini zədələyən təhlükəli təbliğat nümunələridir. Aydındır ki, müxtəlif media resurslarında ardıcıl şəkildə yayımlanan və məzmun baxımından bir-birini tamamlayan bu tip materialları ayrı-ayrı jurnalistlərin şəxsi mövqeyi və ya təsadüfi açıqlamaları kimi qiymətləndirmək kifayət deyil. Eyni istiqamətdə və oxşar ritorika ilə aparılan informasiya kampaniyası müəyyən siyasi tezislərin media vasitəsilə sistemli şəkildə ictimaiyyətə çatdırılması təsəvvürünü yaradır. Bu isə informasiya məkanından dövlətlərarası münasibətlərə təzyiq və qarşıdurma vasitəsi kimi istifadə olunmasıdır”.
Parlamentari vurğulayıb ki, Rusiya media məkanında Azərbaycan əleyhinə aqressiv və təhdid dolu materialların sistemli şəkildə yayılması iki ölkə arasında münasibətlərin normallaşdırılması səylərinə xidmət etmir:
"Bu gün Rusiyanın Azərbaycandakı səfiri Mixail Yevdokimovun Azərbaycan Respublikasının Xarici İşlər Nazirliyinə çağırılması və ona müvafiq media resurslarında yayımlanan bu qəbildən olan materialların qəbuledilməzliyi barədə mövqenin çatdırılması da mühüm diplomatik addımdır. Azərbaycanın bu mövqeyi eyni zamanda Rusiya tərəfinə öz informasiya məkanında Azərbaycan əleyhinə təhdid və nifrət ritorikasının qarşısının alınması, dövlətlərarası münasibətlərə zərər vuran halların yolverilməzliyinin təmin edilməsi və müvafiq tədbirlərin görülməsi ilə bağlı açıq çağırışdır. Təəssüf doğuran əsas məqam ondan ibarətdir ki, Rusiya media məkanında Azərbaycan əleyhinə aqressiv və təhdid dolu materialların sistemli şəkildə yayılması iki ölkə arasında münasibətlərin normallaşdırılması və qarşılıqlı etimadın möhkəmləndirilməsi səylərinə xidmət etmir. Əksinə, belə yanaşma ictimai rəydə gərginliyi artırır, xalqlar arasında qarşılıqlı hörmətə xələl gətirir və Azərbaycan-Rusiya münasibətlərinin yenidən pisləşməsi üçün zəmin yaradır”.
O bildirib ki, heç bir media platforması və heç bir "azad söz” anlayışı dövlətlərarası münasibətlərə zərər vuran, xalqlar arasında düşmənçilik və qarşıdurma yarada biləcək təhdid və zorakılıq çağırışlarına haqq qazandıra bilməz:
"Azərbaycan xalqı öz dövlətinə, dövlətçiliyinə və milli maraqlarına qarşı yönəlmiş bu cür məqsədli informasiya kampaniyalarını qətiyyətlə pisləyir. Heç bir media platforması və heç bir "azad söz” anlayışı dövlətlərarası münasibətlərə zərər vuran, xalqlar arasında düşmənçilik və qarşıdurma yarada biləcək təhdid və zorakılıq çağırışlarına haqq qazandıra bilməz. Azərbaycan tərəfi Rusiya dövlət qurumlarından öz informasiya məkanında Azərbaycana qarşı təhqir, hədə və zorakılığa çağırış xarakterli materialların yayılmasının qarşısının alınmasını, bu kimi hallara hüquqi və siyasi qiymət verilməsini və dövlətlərarası münasibətlərə xələl gətirən təxribatçı fəaliyyətlərin dayandırılması istiqamətində konkret tədbirlər görülməsini gözləyir”.
"Azərbaycan və Rusiya xalqları arasında tarixən formalaşmış əlaqələrin və qarşılıqlı hörmətin qorunması hər iki tərəfin məsuliyyətidir. Bu baxımdan, media resurslarının məsuliyyətsiz və təxribatçı ritorikadan istifadə etməsi deyil, əksinə, xalqlar arasında qarşılıqlı anlaşma və hörmətin möhkəmləndirilməsinə töhfə verməsi daha məqsədəuyğundur. Azərbaycanın mövqeyi aydındır: dövlətimizə, xalqımıza və rəhbərliyimizə qarşı təhdid və zorakılıq çağırışları, eləcə də ölkəmizin daxili sabitliyinə və ərazi bütövlüyünə qarşı yönəlmiş istənilən təbliğat yolverilməzdir. Belə cəhdlər qarşısında Azərbaycan cəmiyyəti öz milli maraqlarını, dövlətçiliyini və milli həmrəyliyini qorumaqda qətiyyətlidir”,-deyə deputat qeyd edib.
Şahanə Ziyad
