Siyasi şərhçi Elşad Paşasoy bu gün qonağı olduğu AzTV-də yayımlanan "Hədəf” verilişində Ermənistan-Azərbaycan münasibətləri və regiondakı nəqliyyat-kommunikasiya imkanları barədə fikirlərini bölüşüb.
AZXEBER.COM xəbər verir ki, o, bildirib ki, əgər Azərbaycan və Ermənistan arasında ikitərəfli əsaslarla sülh prosesində müəyyən irəliləyiş əldə edilibsə, məhz bu istiqamətdən başlamaq vacibdir. Paşasoyun sözlərinə görə, hələlik qitələrarası daşımaları, rabitəni və logistikanı bir kənara qoyaraq, ilk növbədə Azərbaycanın əsas hissəsi ilə Naxçıvan Muxtar Respublikasını birləşdirəcək yolun açılması məsələsinə diqqət yetirilməlidir.
"Elə bir yoldan söhbət gedir ki, bu, sadəcə yol deyil, həm də dəhliz funksiyası daşıyır. Ermənistan əgər doğrudan da Azərbaycanla sülh imzalamağa hazırdırsa, ilk növbədə bu yolun açılmasına razılıq verməlidir. Bu dəhlizdən Ermənistanın özü də fayda götürə bilər. Rəsmi İrəvan bunu anlamalıdır,” – deyə Paşasoy vurğulayıb.
Siyasi şərhçi qeyd edib ki, əgər Ermənistan tərəfindən bu istiqamətdə düşüncələr formalaşıb və Azərbaycanın təklif etdiyi həll yolunu qəbul etməyə hazırdırlarsa, artıq gecikmə yalnız Ermənistanın öz maraqlarına zidd olacaq. Çünki Azərbaycanın alternativ yol imkanları da mövcuddur.
"Elə bir alternativ yol da var ki, Araz çayı üzərindən İran ərazisinə keçməklə həyata keçirilə bilər. Gələcəkdə bu yolun da dəhliz funksiyası yerinə yetirməsi istisna deyil və bu məsələ də müzakirə mövzusudur,” – deyə Paşasoy fikrini tamamlayıb.
Oksana Orucova
