Xəbər verdiyimiz kimi, "Arzum 9999” ləqəbli bloger İlduzə Hacıyeva ev dustaqlığına buraxılıb. Elnur Nuriyevin sədrlik etdiyi məhkəmə kollegiyası müdafiə tərəfinin həbs qətimkan tədbirinin ev dustaqlığı ilə əvəz edilməsi barədə vəsatətini təmin edib.
Məhkəmə Arzumun 4 övladı olmasını, onlardan birinin ağır autizmdən əziyyət çəkməsini nəzərə alıb. Bu əsasla Arzum ev dustaqlığına buraxılıb.
Ona ev dustaqlığında olduğu müddətdə sosial şəbəkələrdən istifadə etməyə qadağa qoyulub. O, yalnız telefon vasitəsilə ailə üzvləri ilə əlaqə saxlaya biləcək.
Bəs ev dustaqlığına buraxılan şəxslərə hansı məhdudiyyətlər tətbiq olunur? Sosial şəbəkələrdən istifadə hansı hallarda qadağan edilə bilər?
Vəkil Roman Qaraşov AZXEBER.COM-a açıqlamasında deyib ki, ev dustaqlığında olan hər bir şəxs üçün sosial şəbəkələrdən istifadə qanunla birbaşa qadağan edilmir:
"Birinci instansiya məhkəməsinin hökmündən verilmiş apellyasiya şikayətinə baxılarkən apellyasiya instansiyası məhkəməsi qətimkan tədbirinin dəyişdirilməsi məsələsini də həll etmək səlahiyyətinə malikdir. Azərbaycan Respublikası Cinayət-Prosessual Məcəlləsinin 163-cü maddəsinə əsasən ev dustaqlığı şəxsin cəmiyyətdən tam təcrid edilmədən, lakin məhkəmə tərəfindən müəyyən edilmiş məhdudiyyətlər əsasında tətbiq edilən qətimkan tədbiridir. Həmin maddənin 163.3 və 163.3-1-ci bəndlərində ev dustaqlığında olan şəxsin üzərinə qoyula biləcək vəzifələr sadalanmışdır. Lakin həmin normalarda sosial şəbəkələrdən istifadənin ümumi və avtomatik qaydada qadağan edilməsi nəzərdə tutulmamışdır. Deməli, ev dustaqlığında olan hər bir şəxs üçün sosial şəbəkələrdən istifadə qanunla birbaşa qadağan edilmir”.
O qeyd edib ki, sosial şəbəkədən istifadə qanundan irəli gələn ümumi qadağa hesab edilə bilməz:
"Bununla yanaşı, CPM-in 163.3-1.4 və 163.3-1.5-ci maddələrinə əsasən məhkəmə işin konkret halları, ittihamın xarakteri, cinayətin törədilmə üsulu və cinayət mühakimə icraatının maraqları nəzərə alınmaqla müəyyən şəxslərlə ünsiyyətin qadağan edilməsi və ya təqsirləndirilən şəxsin lazımi davranışını təmin edən digər əlavə məhdudiyyətlər müəyyən edə bilər. Buna görə də, əgər cinayət işi öz xarakterinə görə sosial şəbəkələrdən istifadə etməklə törədilmişdirsə, yaxud sosial şəbəkələrdən istifadə şahidlərə, zərərçəkmişə və ya digər iştirakçılara təsir göstərilməsi, sübutların gizlədilməsi və ya cinayət prosesinə maneə yaradılması riski yaradırsa, məhkəmə əsaslandırılmış qərarla belə istifadəyə məhdudiyyət qoya bilər. Lakin belə qadağa yalnız məhkəmənin konkret qərarında nəzərdə tutulduğu halda tətbiq edilir və qanundan irəli gələn ümumi qadağa hesab edilə bilməz”.
Şahanə Ziyad
