Ermənistanın Gorus şəhərində küçələrdən birinə İranın Nain şəhərinin adı verilib. Bu barədə "Fars Nyus” məlumat yayıb. Məlumata görə, ötən il Nain və Gorus şəhərləri arasında qardaşlaşma sazişi imzalanıb. Küçəyə Nain adının verilməsi həmin saziş çərçivəsində atılan ilk konkret addımlardan biri olub.
Siyasi şərhçi Azər Həsrət AZXEBER.COM-a açıqlamasında deyib ki, İran indiki şəraitdə, bu qədər irəli gedib ermənilərlə qucaq-qucağa olmamalıdır:
İran axı özünü şiəliyin mərkəzi hesab edir, dünyaya belə təqdim edir. Bəs harada qaldı o qardaşlıq, harada qaldı o məzhəb təəssübkeşliyi, harada qaldı o din təəssübkeşliyi?”.
O qeyd edib ki, İran ermənilərlə qardaş olduqlarını özləri də açıq şəkildə deyirlər:
"İran ermənilərlə qardaş olduqlarını özləri də açıq şəkildə deyirlər. İranın ali rəhbərləri dəfələrlə Ermənistanın rəhbərliyi ilə görüşərkən deyiblər ki, biz qardaşıq, bizim kökümüz bir yerdən gəlir. Yəni, necə olur ki, belə bir şəraitdə biz deyəndə ki, İran Azərbaycanla deyil, Ermənistanla, ermənilərlə qardaşlıq edir, Azərbaycandakı o təbliğatı aparanlar üstümüzə gəlirlər ki, şər atırsınız? İndi İrandan soruşun ki, niyə sizin bir şəhəriniz Ermənistanın bir şəhəri ilə qardaşlaşır? Nə zərurət var idi? Ola bilər, gələcəkdə bəlkə də bunu etmək olardı. Amma indiki şəraitdə, hələ Azərbaycanla sülh müqaviləsi bağlanmamış bir vaxtda məqsəd nədir ki, İran Ermənistanla qardaşlaşır? Əgər İslam təəssübkeşliyi, məzhəb təəssübkeşliyi varsa, İran bunu etməməli idi”.
"Bu isə bir daha sübut edir ki, İranın o din və məzhəb təəssübkeşliyi həmin dövlətin siyasi maraqlarına xidmət etməkdən başqa bir işə yaramır. Ona görə də Azərbaycanda İranın arxasınca kor-koranə gedənlər bir qədər gözlərini açıb daha irəli baxmağa çalışsınlar”,- deyə, o bildirib.
Şahanə Ziyad
