"Şəhərsalma və Memarlıq İli”ndə "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın həyata keçirilməsi çərçivəsində Göygöl Rayon İcra Hakimiyyəti və Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzinin birgə təşkilatçılığı ilə keçirilən Regional Müşavirədə Göygöl Rayon İcra Hakimiyyətinin başçısı Vüqar Novruzov, Heyvan Sağlamlığı və Baytarlıq Xidmətləri Mərkəzinin rəis müavini, rəis vəzifəsini müvəqqəti icra edən Azər Məmmədov, Respublika Süni Mayalanma Mərkəzinin direktoru Ceyhun Nəsibov, Heyvandarlı və Balıqçılıq Elmi Tədqiqat İnstitutunun direktoru Mahir Hacıyev, Gəncə şəhəri, Göygöl, Qazax, Ağstafa, Tovuz, Şəmkir, Gədəbəy, Daşkəsən, Samux rayonlarının Baytarlıq İdarələrinin rəisləri və əməkdaşları, həmçinin özəl baytar həkimləri iştirak edirlər.
Göygöl RİHB-sı tədbiri giriş sözü ilə açaraq bugünkü regional müşavirənin keçirilməsinin əsas məqsədi heyvanlar arasında yoluxucu xəstəliklərin qarşısının alınması, onların aradan qaldırılması istiqamətində görülmüş işlərin müzakirəsi, mövcud vəziyyətin qiymətləndirilməsi və qarşıda duran vəzifələrin müəyyənləşdirilməsi olduğunu vurğulayaraq dövlət başçısı, möhtərəm Prezidentimiz cənab İlham Əliyevin rəhbərliyi ilə ölkəmizdə aqrar sektorun inkişafı, ərzaq təhlükəsizliyinin təmin olunması və kənd təsərrüfatında müasir texnologiyaların tətbiqi istiqamətində ardıcıl və məqsədyönlü islahatlar həyata keçirildiyini bildirib.
Azər Məmmədov ölkədə epizootik sabitliyin qorunub saxlanılmasının mühüm əhəmiyyət kəsb etdiyini qeyd edərək, dövlət-özəl baytarlıq münasibətlərinin daha da inkişaf etdirilməsi, daha çevik baytarlıq xidmətlərinin yaradılması, aparılan tədbirlərin rəqəmsallaşdırılması, "Epizootiya əleyhinə tədbirlər planı”na uyğun olaraq vaksinasiya tədbirlərinin vaxtında və keyfiyyətlə həyata keçirilməsi, maarifləndirici tədbirlərin aparılması, baytarlıq subyektlərinin peşəkarlıq səviyyəsinin artırılması, şəffaflığın və vətəndaş məmnunluğunun təmin edilməsinin vacibliyini qeyd edib.
Göygöl, Samux, Goranboy, Daşkəsən, Şəmkir, Tovuz və Gədəbəy rayon Heyvan Sağlamlığı və Baytarlıq Xidmətləri idarələrinin rəhbərləri, eləcə də özəl baytar həkimləri çıxış edərək bölgədə epizootik vəziyyət barədə məlumat veriblər. Mövzu ətrafında geniş fikir mübadiləsi aparılıb, səslənən təkliflər qeydə alınıb.
Tədbirdə "Epizootiya əleyhinə tədbirlər planı”na uyğun olaraq peyvəndləmə tədbirlərinin vaxtında və keyfiyyətlə həyata keçirilməsi, mövcud çatışmazlıqların qısa müddətdə aradan qaldırılması məqsədilə rayon Heyvan Sağlamlığı və Baytarlıq Xidmətləri idarələrinə tapşırıq və tövsiyələr verilib.
Sonda səyyar baytarlıq xidmətlərini həyata keçirən, müasir texniki avadanlıqlarla təmin olunmuş nəqliyyat vasitəsinin təqdimatı keçirilib.
