Asif Əsgərli
Azərbaycan Demokratik Tələbə
Gənclər Təşkilatının sədri
Yeni bir "Gözəlləmə” siyasi şousu başlayıb, dostlar özü də nə şou. Ay qoymayın ölkəmizin "Femida”sı (bunu deyəndə adamın dönə-dönə bu ədalət ilahəsindən üzr istəməyi gəlir) həbs olunub, ay nə bilim ölkədə siyasi repressiya başlayıb, ay haray hökumət qatığımıza ağ dedi. Bircə qaşqaldaq çatmır "Avropa uşaqları”.
Dünən Qazax rayon məhkəməsinin hökmü ilə gömrük bəyannaməsinə qeyd edilməyən valyuta keçirdiyinə görə Cinayət Məcəlləsinin qaçaqmalçılıq maddəsi ilə ittiham olunan AXCP sədr müavini Gözəl Bayramlının 3 il müddətinə azadlıqdan məhrum edilməsini Əli Kərimlinin virtual qaragürühu növbəti şouya çeviriblər. Təsəvvür edin bu söz pəhlavanları hüquqa, qanunlara söykənən bir kəlmə işlətməyərək, ancaq məhkəməni siyasi qərarlar verməkdə ittiham edir, istintaqı aparanları, orada iştirak edən şahidləri və digər şəxsləri təhqir edirlər. Hər zaman öz ampulasında olan bu "çatxana bülbülləri” ağalarının təlimatlarına uyğun yalnız bir xətti tirajlayırlar: nə olur olsun qara yaxaq, böhtan ataq, alçaldıcı ifadələr işlədək, əks arqument, rəy və fikirləri bloklayaq və Qərb dairələri üçün yeni bir "Gözəlləmə” dastanı uydurub, "Femida”mızın həbsi adı ilə əlavə maliyyə kanalları arayıb tapaq.
Guya bunlar ana, bacı təəssübkeşidirlər, həbs olunanın qadın olduğunu bəyan edərək, zərif cincin nümayəndəsinə qarşı atılan bu hüquqi addımı "ədalətsiz” adlandırırlar. Facebook və youtube pələngləri əvvala bilməlisiniz ki, qanunun cins fərqi olmasa da, bu məsələdə humanistlik göstərilərək ən aşağı cəza tətbiq edilmiş, prossesin ilk günündən obyektiv hüquqi addımlar atılmış, bütün müdafiə hərəkətləri təmin edilmiş, ədalətli istintaq və məhkəmə araşdırılması aparılmış və iclaslar ictimaiyyətə açıq şəkildə keçirilmişdir.
Yaxşı bu dövlətin hüquq-mühafizə orqanlarının və müstəqil məhkəmə hakimiyyətinin qərarlarından narazısınızsa, hüquqi addımlarla - apellyasiya, kassasiya və digər normativ-qanunvericilik qaydasında şikayətinizi istənilən instansiyaya daşıyın da, lap istəyirsiz avropalı ağalarınızın qəbuluna aparın. Day şakərinizə uyğun şər-böhtan atmaqla, dövlətə, onun hakimiyyət qollarına təzyiq etməklə "oküz altında buzov aramağın” nə yeri var.
Heç kim istəməz ki, Azərbaycan qadını dəmir barmaqlıqlar arasına düşsün, amma onu da siz zatlar və tamahınız vadar etdi naftalin iyli "siyasətçi”lər. İsti yerlərinizdə oturub qadından daşıyıcı kimi istifadə edəndə, onu çirkli oyunlarınıza alət edəndə oturub fikirləşəydiniz ki, hüquqla ədalətlə toqquşacaqsınız ay savadsız "roza lüksemburq”çular.
Bu son "Gözəlləmə” şounuz haqda çox nağıllar uydura bilərsiz dil pəhlavanları, daydaylarınız vasitəsilə qoca qitədən, okeanın o üzündən yeni pul kisələri də tapa bilərsiz. Amma bir şeyi bilməlisiniz ki, Femidanın əlində olan o haqq-ədalət qılıncı daim başınızın üstündə olacaq və tərəzinin bir gözünə sizləri yığanda daim aşağı yuxarı oynayacaqsınız.
Hə, bu arada sosial şəbəkələrdə "Gözəlləmə” dastanı düzəltdiyiniz gün Strasburqda sizinlə eyni amal və xəttə xidmət edən Ermənistan rəhbəri Serj Sarqsyan ikili standartdan əl çəkməyən Avropa Şurasının verdiyi qol-qanaddan bəhrələnərək, yenidən bütün dünyaya ağ yalan danışaraq, Azərbaycan və Türkiyə haqda təhrifedici və aşağılayıcı çıxış etdi. Bəs hər zaman "bu dövlətin yanındasız”, onu "canınızdan çox istəyirsiz”, onun üçün "yanırsız” ay vətənşüvənlər. Heç olmasa özünüzdə, nə bilim nəysə bir şey tapıb, bu caniyə, Xocalı cəlladına və ona meydan verən Avropaya bir etiraz edin, cavab verin. Doğu Perincek qədər də ola bilməzsiniz? Adam Türkiyədə hökuməti bütün günü söyürdü, kommunist, işçi partiya fəalı olaraq "kürd təəssübkeşliyini” qaldırırdı, ama Avropada dik, mərd-mərdanə dedi ki, "erməni soyqırımı” uydurmalarınıza baş əyməyəcəm və Türkiyəni aşağılamanıza imkan verməyəcəm. Belə addımlar ata bilərsiz ay nağılbazlar, şoubazlar, onsuz da Avropaya səpələnmisiniz, üstəlik də "diliniz” daha uzundu.
