"HƏMAS-ın Siyasi Bürosunun rəhbəri İsmayıl Haniyənin Tehranda öldürülməsi bu gün geniş müzakirə mövzusudur. Birincisi, ona görə ki, Tehranda onun olması və ya gizlədilməsi, o cümlədən İrana arxalanması faktı hamı üçün bəlli oldu".
Bu sözləri AZXEBER.COM-a açıqlamasında politoloq İlyas Hüseynov bu gün İranda sui-qəsd nəticəsində öldürülən HƏMAS lideri İsmayıl Haniyədən danışarkən deyib.
Siyasi şərhçi hesab edir ki, baş verən hadisə Fələstin və İranı daha da yaxınlaşdıracaq:
"İsrail dəqiq hava zərbəsiylə öz hədəfinə çatıb və bu İranı daha da qəzəbləndirib. Hətta verilən açıqlamalar da bundan ibarətdir ki, baş verən hadisə Fələstin və İran xalqını yaxınlaşdıracaq, birləşdirəcək. Bununla yanaşı, rəsmi Vaşinqtondan da bildirilib ki, İsrailə hücum ediləcək təqdirdə ABŞ İsraili qoruyacaq, müdafiə edəcək, təhlükəsizlik zəmanəti verəcək. Ümumilikdə qeyd etmək lazımdır ki, İsmayıl Haniyənin həm də çox önəmli hərəkata rəhbərlik etməsi və HƏMAS hərəkatının əsas funksionerlərindən biri olması İsrail və HƏMAS arasında gedən müharibəyə təsir göstərəcəkdi. Amma ola bilsin ki, münaqişənin və müharibənin arealı bir qədər genişlənsin. Ola bilsin ki, baş verən hadisə bütün Yaxın Şərqə yayılsın və beləliklə, son dövrlər Türkiyə və İsrail arasında yaranan gərginliyi də nəzərə alaraq bu hadisənin baş verməsi şübhəsiz ki, Yaxın Şərqdə daha geniş və total eskalasiyanı formalaşdıra bilər".
Mikayıl Mirzəzadə
