8 noyabrda Azərbaycanın Şanlı Zəfər Günündən 2 il ötür.
Bu savaş bir çox aspektdə gedirdi və birmənalı şəkildə demək olar ki, Azərbaycan bütün cəbhələrdə düşməni məğlub etdi.
Ali Baş Komandan, Prezident İlham Əliyevin qətiyyəti düşmənə göz dağı verirdi.
Məsələ ilə bağlı AZXEBER.COM-a danışan siyasi şərhçi, "Xalq cəbhəsi” qəzetinin baş redaktoru Elçin Mirzəbəyli bildirib ki, müharibə təkcə siyasi yox bütün qütblərdə gedirdi:
"44 günlük Vətən Müharibəsini xatırlayanlar ilk gündən başlayaraq prosesin təkcə döyüş meydanında getmədiyini və bütün qütblərdən ölkəmizə qarşı aparılan informasiya savaşının qarşısında Ali Baş Komandanın həm də informasiya ordusuna rəhbərlik edən bir şəxs kimi dayandığını görə bilirdi. Həmin günlərdə Azərbaycan prezidentinin tvitləri, bəyanatları, açıqlamaları Azərbaycan xalqına müraciətləri bizim nə qədər milli vətənpərvərlik ruhumuzun ölkədə yüksəlməsinə rəvac verirdisə, liderimizin ətrafında birləşən Azərbaycan xalqının daha da bütövləşməsinə zəmin yaradırdısa, bir o qədər Azərbaycana qarşı həyata keçirilən total informasiya kampaniyasının qarşısının alınmasına xidmət edirdi”.
Politoloq qeyd edib ki, İlham Əliyevin cəsarət və qətiyyəti dünya üçün də bir nümunədir:
"Azərbaycan Prezidentinin həmin günlərdə nümayiş etdirdiyi mövqe, cəsarət, qətiyyət və iti zəka, qənaətimə görə, hələ uzun illər boyu dünyanın müxtəlif informasiya resursları tərəfindən araşdırılacaq və bu, bir nümunə kimi göstəriləcək. Bu, öz xalqının, dövlətinin maraqlarına sonuna qədər müdafiə etməyi bacarmaq və müdafiə etmək bacarığının bir nümunəsidir. Yəni, söhbət bütün komponentlərdən gedir. Burada sadəcə dərin və iti zəka, hazırcavablıq digər amillər mühüm rol oynamır. Burada həm qətiyyət, cəsarət və vətənə olan sevgi, öz mövqeyinə sonuna qədər inanmaq kimi yüksək keyfiyyətlər də yer alır. Bu aspektdən də düşünürəm ki, həmin günlər bir media mənsubu olaraq bizim üçün də ayrıca bir qürur mənbəyi idi.
Şübhəsiz ki, Azərbaycan torpaqlarının işğaldan azad edilməsi və həll edilən böyük zəfər bizim üçün tarixi bir qürurdu və zaman keçdikcə bütöv Azərbaycan xalqı bu qüruru yaşayacaq, bu zəfər ideyası ətrafında daim birləşəcək”.
Siyasi şərhçi əlavə edib ki, Ali Baş Komandanın nümayiş etdirdiyi mövqe döyüş meydanında əldə etdiyimiz zəfərlə deyil, həm də informasiya sahəsində qazanılan böyük uğurdur:
"Bununla yanaşı, bir media mənsubu olaraq da, informasiya savaşında Azərbaycan liderinin, Ali Baş Komandanın nümayiş etdirdiyi mövqe və hesab edirəm ki, bütün ən kəskin sualların cavabında Azərbaycanın mövqelərinin arqumentləşdirərək, faktlara əsaslanaraq dünya ictimaiyyətinin diqqətinə çatdırılması prinsipial olaraq, həqiqətin tam çılpaqlığına qədər ifadə edilməsi, bizim hər birimiz üçün nümunə və qürurverici haldır. Bu gün əgər informasiya sahəsində mücadilə aparmaq, önə çıxmaq nümunəsi varsa, təkcə Azərbaycanın vətəndaşları üçün deyil, bütün azərbaycanlılar üçün, dünyanın müxtəlif qütbləri tərəfindən ədalətsizliyə məruz qalan insanlar üçün, xalqlar üçün İlham Əliyevin timsalında önəmli bir nümunə var. Bu aspektdən düşünürəm ki, şübhəsiz, həmin o tarix, zaman kəsiyi təkcə döyüş meydanında əldə etdiyimiz zəfərlə deyil, həm də informasiya sahəsində qazanılan böyük uğurla yadda qalacaq və xatırlanacaq”.
Mikayıl Mirzəzadə
