Filippində dünyanın müxtəlif ölkələrindən olan alimlər qrupunun apardığı araşdırmalar göstərib ki, kişilər ata olduqdan sonra onlarda kişi hormonları - yəni testosteronun səviyyəsi aşağı düşür. Bu isə onları daha ailəcanlı edir, xəyanətə meylini azaldır. Necə deyərlər, təbiət özü kişiləri ailəyə bağlayır. Testosteron kişilərdə cinsi fəallığı tənzimləyən hormondur. Alimlər 624 gənc kişi üzərində onlar ata olandan əvvəl və sonra müşahidələr aparıblar. Nəticədə məlum olub ki, kişinin övladı dünyaya gələn kimi onda testosteronun səviyyəsi əhəmiyyətli dərəcədə azalır. Bu, xüsusilə körpənin ilk bir aylığında müşahidə olunur. Ata olana qədər isə kişilərdə bu hormonun səviyyəsi yüksək olur. Tədqiqatın rəhbəri Kristofer Kuzavanın sözlərinə görə, insanın valideynlik hissi o qədər güclüdür ki, hətta bioloji tələbatını da dəyişə bilir. Atalıq hissi kişilərdə emosional, psixoloji və psixi dəyişikliklərə səbəb olur. Alimlər inanır ki, bu dövrdə kişilərdə testosteronun aşağı düşməsi həm də bəzi xroniki xəstəliklərdən müdafiə edə bilər. Məhz gənc atalarda övladı olmayan kişilərə nisbətən xətəliklərə az rast gəlinməsi də bununla izah olunur. Endokrinoloq Eşli Qrosmanın sözlərinə görə, bu araşdırma elmdə inqilabi dəyişiklik edib. Bundan əvvəl kişilərdə yalnız yaşla, hər hansı xəstəliklə bağlı bu hormonun aşağı düşməsi məlum idi. Sosioloqlar isə kişilərin daha çox həyat yoldaşlarının yenicə ana olduğu vaxtlarda xəyanətə meylli olduğunu deyirlər. Amma sən demə təbiət özü buna imkan vermirmiş.
//Ans tv
