Xəbər verdiyimiz kimi, 4 iyul 2025-ci il tarixində İqtisadi Əməkdaşlıq Təşkilatının (ECO) 17-ci Zirvə görüşü Azərbaycanın Xankəndi şəhərində keçirilir.
Görüşün mahiyyəti, o cümlədən Xankəndidə keçirilməsinin dünya ölkələrinə verdiyi mesaj ilə bağlı Milli Məclisin deputatı Naqif Həmzəyev AZXEBER.COM-a açıqlama verib.
Deputat öz açıqlamasında bildirib ki, zirvədə yüksək səviyyəli iştirakın müşahidə olunması Azərbaycanın nüfuzunu və gücünü göstərir:
"Bu görüş yalnız iqtisadi əməkdaşlıq sahəsində deyil, həm də geosiyasi baxımdan böyük əhəmiyyət daşıyır. Xankəndidə - bu zirvənin təşkil edilməsi beynəlxalq arenada güclü siyasi mesajlar göndərir.
İqtisadi Əməkdaşlıq Təşkilatı 1985-ci ildə Türkiyə, İran və Pakistanın təşəbbüsü ilə yaradılmış regional təşkilatdır. Hazırda 10 üzv dövlət (Azərbaycan, Əfqanıstan, İran, Qazaxıstan, Qırğızıstan, Pakistan, Tacikistan, Türkiyə, Türkmənistan, Özbəkistan) təşkilata üzvlüklərini davam etdirirlər. Təşkilat 500 milyondan çox əhali və 9 trilyon dollardan çox ÜDM-ə malikdir.
Bu zirvədə yüksək səviyyəli iştirak müşahidə olunur. Bu Azərbaycanın nüfuzunu və gücünü göstərir.
Deputat qeyd edib ki, görüşün Xankəndidə keçirilməsi çox önəmlidir:
"Xankəndidə ECO zirvəsinin keçirilməsi Azərbaycanın ərazi bütövlüyünün və suverenliyinin beynəlxalq səviyyədə tanınmasının ən güclü nümayişidir. Xankəndində beynəlxalq zirvənin təşkil edilməsi Azərbaycanın öz ərazi bütövlüyünü bərpa etməsi, beynəlxalq ictimaiyyatin bu reallığı qəbul etməsi, Qarabağın artıq tam şəkildə Azərbaycanın nəzarətində olması kimi kimi mesajlar verir.
Azərbaycanın üçüncü dəfə ECO zirvəsinə ev sahibliyi etməsi ölkənin regional liderlik mövqeyinin güclənməsini göstərir. Bununla deyə bilərik ki, Azərbaycan Avropa üçün alternativ enerji mənbəyi rolu oynayır.
Xankəndidə zirvənin keçirilməsi Azərbaycanın işğaldan azad edilmiş ərazilərdə apardığı genişmiqyaslı yenidən qurma işlərinin beynəlxalq tanınmasıdır".
Deputat həmçinin əlavə edib ki, Türkdilli dövlətlərin Prezidetlərinin zirvədə iştirakı türk dövlətlərinin strateji müttəfiqliyinin gücünü bir daha nümayiş etdirir:
"Bu görüş Türk dünyasının birliyini sübut edir. Xankəndidəki zirvə Ermənistan üçün güclü siyasi mesajdır. Belə ki, görüş keçmiş işğal siyasətinin tamamilə uğursuz olduğunu göstərir. Bununla yanaşı, bölgədə izolyasiya riski ilə üzləşdiyini xatırladır. Ermənistan üçün yeni reallıqları qəbul etmək zərurətini vurğulayır.
Bu zirvə həmçinin Azərbaycanın çoxvektorlu xarici siyasətinin uğurunu və ölkənin regional iqtisadi inteqrasiyada oynadığı artan rolun əhəmiyyətini vurğulayır. Gələcəkdə bu tip tədbirlərin bölgədə sülh və rifaha töhfə verəcəyi gözlənilir.
Xankəndidə keçirilən bu zirvə yalnız iqtisadi əməkdaşlıq sahəsində deyil, həm də geosiyasi baxımdan yeni səhifənin açılmasını simvolizə edir. Bu, Azərbaycanın 2020-ci il Vətən müharibəsindəki qələbəsinin diplomatik və iqtisadi baxımdan davamı kimi qiymətləndirilə bilər".
Oksana Orucova
