"Müasir dünyamız informasiya bolluğu içərisindədir. Hər birimiz gündəlik həyatımızda müxtəlif mənbələrdən məlumat alır və onları dəyərləndirmək məcburiyyətində qalırıq. Ancaq bu gün doğru və yanlış məlumatlar bir-birinə qarışıb. Təqdim olunan məlumatları təhlil etmək, qiymətləndirmək, düzgün başa düşmək və tənqidi yanaşmaq, bir sözlə nəyin doğru, nəyin yanlış olduğunu fərqləndirmək bacarığı isə media savadlılığından asılıdır. Məhz media savadlılığı olan insanlar yanlış məlumatları ayırd edə, yalan xəbərlərin təsirinə düşmədən düzgün qərarlar qəbul edə bilərlər".
Bu fikirləri AZXEBER.COM-a açıqlamasında "Bakıvaxtı.az" xəbər portalının baş redaktoru Qalib İbrahimoğlu media savadlılığı həftəsinin əhəmiyyətindən danışarkən deyib.
Baş redaktor qeyd edib ki, Azərbaycanda media savadlılığını inkişaf etdirmək cəmiyyətin daha sağlam və məlumatlı olmasına yardımçı olacaq:
"Media savadlılığı vacib bir bacarıqdır. Media savadlılığı yalnız xəbərləri deyil, sosial media, televiziya, reklam və digər informasiya mənbələrini də əhatə edir. Bu, bizə manipulyasiyadan, yalan məlumatlardan (dezinformasiyadan) qorunmağa kömək edir və cəmiyyətdə düzgün informasiya mədəniyyəti formalaşdırır. Azərbaycanda media savadlılığını inkişaf etdirmək cəmiyyətin daha sağlam və məlumatlı olmasına, dezinformasiyanın yayılmasının qarşısının alınmasına kömək edəcək. Bunun üçün təhsil, maarifləndirmə və dövlət-səviyyəsində dəstək mühüm rol oynayır.
Media ilə düzgün işləməyi bacaran insanlar şəxsi və peşəkar qərarlarını daha ağıllı şəkildə verə bilirlər. Bu bacarıq təhsil, iş və sosial münasibətlərdə də önəmli rol oynayır".
Q. İbrahimoğlu hesab edir ki, media savadlılığının inkişafına orta məktəbdən başlamaq lazımdır:
"Media savadlılığının inkişafına isə orta məktəbdən başlamaq lazımdır. Belə ki, təhsil sistemində media savadlılığının inteqrasiyası vacib məsələdir. Məktəblərdə, eləcə də ali təhsil ocaqlarında media savadlılığı üzrə xüsusi dərslərin, kursların keçirilməsinə ehtiyac var. Şagirdlər və tələbələr informasiyanı tənqidi dəyərləndirmək, etibarlı mənbələri seçmək və faktları yoxlamaq bacarığını öyrənməlidir. Bundan başqa, əhalinin geniş təbəqələri arasında media savadlılığı barədə məlumatlılığı artırmaq üçün kampaniyalar keçirmək lazımdır. Sosial şəbəkələrdə, televiziyada və digər platformalarda bu mövzuda maarifləndirici materiallar yayımlamaq faydalı olar. Jurnalistlər, müəllimlər və digər mütəxəssislər üçün xüsusi treninqlər və seminarlar təşkil olunmalıdır. Bu, onların öz sahələrində daha savadlı fəaliyyət göstərmələrinə kömək edəcək. Media savadlılığını təşviq edən layihələr həyata keçirilməlidir. Bu layihələrin dövlət tərəfindən dəstəklənməsi isə daha effektiv nəticə verə bilər. Dezinformasiyanın qarşısını almaq üçün Azərbaycanda faktların yoxlanılması üzrə platformalar daha geniş yayılmalı və insanlar bu alətləri necə istifadə edəcəklərini öyrənməlidirlər. Fikirlərimizi ümumiləşdirərək deyə bilərik ki, media savadlılığı insanlara informasiya dünyasında düzgün istiqamət tapmaq və manipulyasiya edilmədən öz həyatlarını idarə etmək üçün lazımdır".
Mikayıl Mirzəzadə
