Dövlət İmtahan Mərkəzi (DİM) apellyasiya müraciətlərinin ödənişli olması məsələsini nəzərdən keçirir. DİM İdarə Heyətinin sədri Məleykə Abbaszadə bildirib ki, əsassız müraciətlər qurumun ciddi resurs sərf etməsinə səbəb olur. Onun sözlərinə görə, xüsusilə əsassız apellyasiyaların ödənişli edilməsi məsələsi müzakirə oluna bilər.
Təhsil eksperti Məzahir Məmmədli AZXEBER.COM-a açıqlamasında bildirib ki, ötən il apellyasiya ilə bağlı DİM-ə təxminən 15 min müraciət daxil olub.
Ekspert qeyd edib ki, apellyasiya sistemi şəxsin razı qalmadığı nəticə ilə bağlı əsaslandırılmış şəkildə müraciət etməsi və həmin müraciətin araşdırılması deməkdir:
"Apellyasiya qaydasının nə dünya təcrübəsində, nə də digər sahələrdə fərqli modeli var. Şəxs aldığı nəticə ilə razılaşmadıqda müraciət edir və göstərdiyi arqumentlərə qarşı tərəf izahat verməlidir. Ötən il DİM-ə təxminən 15 min apellyasiya müraciəti daxil olub. Bu, müəyyən mənada quruma olan etimad məsələsinin də göstəricisidir. Digər tərəfdən, bu qədər insan özünü haqlı hesab etdiyi üçün apellyasiya hüququndan istifadə edir”.
Məzahir Məmmədli hesab edir ki, apellyasiya müraciətlərinin ödənişli edilməsi müraciətlərin sayını azaltmağa yönələ bilər:
"DİM-in apellyasiya şikayətlərini ödənişli etməsi insanları müraciətdən çəkindirə və müraciətlərin sayının azalmasına səbəb ola bilər. Digər tərəfdən, əvvəlki illərdə apellyasiya müraciətlərinin araşdırılması üçün təxminən iki-üç ay vaxt sərf olunurdu. Amma hazırda 10 mindən çox müraciətin bir neçə gün ərzində nəticələndirilməsi, bir hissəsinin araşdırılması və digər müraciətlər üzrə qərar verilməsi prosesi başa çatmış hesab edilir”
Şahanə Ziyad
