Prezident İlham Əliyevin Naxçıvana səfəri və Azərbaycan Televiziyasına müsahibəsində səsləndirdiyi fikirlər muxtar respublikanın Azərbaycanın milli təhlükəsizlik sistemindəki strateji əhəmiyyətini bir daha gündəmə gətirib.
Naxçıvanın coğrafi mövqeyi onun yalnız Azərbaycanın ərazi bütövlüyünün qorunması baxımından deyil, ümumilikdə Cənubi Qafqazın təhlükəsizlik arxitekturasında mühüm rol oynayan ərazilərdən biri kimi qiymətləndirilməsini şərtləndirir. Türkiyə və İranla həmsərhəd olması muxtar respublikanın geosiyasi əhəmiyyətini daha da artırır.
Son illərdə Naxçıvanda həyata keçirilən hərbi quruculuq tədbirləri də bu strateji mövqenin qorunmasına yönəlmiş addımlar kimi diqqət çəkir. Əlahiddə Ordunun imkanlarının genişləndirilməsi, müasir hərbi texnika ilə təchizat və komando qüvvələrinin yaradılması muxtar respublikanın müdafiə qabiliyyətinin gücləndirilməsinin əsas istiqamətləri sırasında yer alır.
Naxçıvanın hərbi potensialının artırılması regionda dəyişən təhlükəsizlik reallıqları fonunda xüsusi əhəmiyyət daşıyır. Muxtar respublikanın yerləşdiyi coğrafiya həm mümkün təhlükələrə qarşı hazırlığın yüksək səviyyədə saxlanılmasını, həm də Azərbaycanın regional təhlükəsizlik siyasətində strateji imkanlarının qorunmasını zəruri edir.
Digər tərəfdən, Naxçıvanın əhəmiyyəti yalnız hərbi aspektlərlə məhdudlaşmır. Muxtar respublikanın Türkiyə və İranla sərhəddə yerləşməsi onu regional nəqliyyat və kommunikasiya layihələri baxımından da mühüm məkana çevirir. Bu baxımdan Naxçıvanda təhlükəsizlik və müdafiə imkanlarının gücləndirilməsi Azərbaycanın daha geniş regional strategiyasının tərkib hissəsi kimi nəzərdən keçirilə bilər.
Nəticə etibarilə, Naxçıvanın hərbi imkanlarının gücləndirilməsi Azərbaycanın milli təhlükəsizliyinin təmin olunması, ərazi bütövlüyünün qorunması və regionda strateji mövqelərin möhkəmləndirilməsi baxımından mühüm əhəmiyyət daşıyır. Muxtar respublikanın xüsusi coğrafi mövqeyi isə bu əhəmiyyətin gələcəkdə də qorunacağını göstərir.
Müəllif: Sərdar Balayev
Göygöl RİHBA-nın Müharibə iştirakçıları və şəhid ailələri ilə işin təşkili sektorunun müdiri
